വെള്ളമുണ്ട: പ്രായപൂര്ത്തിയാവാത്ത കുട്ടിക്കെതിരെ ലൈംഗികാതിക്രമം നടത്തിയ കേസില് രണ്ട് പേര് അറസ്റ്റില്. തിരുവനന്തപുരം, കരമന, പത്തുമുറി കോമ്പൗണ്ട്, സുനില്കുമാര്(47), പണം വാങ്ങി സുനിലിന് ഒത്താശ ചെയ്ത തൊണ്ടര്നാട്, മക്കിയാട്, കോമ്പി വീട്ടില് സജീര് കോമ്പി എന്നിവരെയാണ് വെള്ളമുണ്ട പോലീസ് അറസ്റ്റ് ചെയ്തത്. 2024 ഒക്ടോബറിലാണ് സംഭവം. സ്കൂള് വിദ്യാര്ഥിനിക്ക് മൊബൈല് ഫോണ് നല്കി വശീകരിച്ച് വാടക ക്വാര്ട്ടേസില് വെച്ചായിരുന്നു ലൈംഗിക അതിക്രമം നടത്തിയത്. പണം വാങ്ങിയാണ് സജീര് സുനില്കുമാറിന് വേണ്ട സഹായങ്ങള് ചെയ്ത് കൊടുത്തത്.
സ്ഥിരമായി മേല്വിലാസമില്ലാത്ത സുനില്കുമാറിനെ പ്രത്യേക അന്വേഷണ സംഘം പിടികൂടിയത് ഏറെ പണിപ്പെട്ടാണ്. തിരുവനന്തപുരം സ്വദേശിയായ സുനില്കുമാര് ചെറുപ്പത്തില് നാട് വിട്ട് വ്യത്യസ്ത മേല്വിലാസത്തില് ജീവിച്ചു വരുകയായിരുന്നു. മൂന്ന് കല്യാണം കഴിച്ച ശേഷം അവരെയെല്ലാം ഉപേക്ഷിച്ചാണ് വയനാട്ടിലെത്തിയത്. നവംബര് 17ന് രെജിസ്റ്റര് ചെയ്ത കേസില് പോലീസ് വിവിധ സ്ഥലങ്ങള് കേന്ദ്രീകരിച്ച് നടത്തിയ നിരന്തരമായ അന്വേഷണത്തിലൂടെയാണ് പ്രതി വലയിലായത്. മാനന്തവാടി എ.എസ്.പിയുടെ നിര്ദേശപ്രകാരം വെള്ളമുണ്ട ഇന്സ്പെക്ടര് എസ്.എച്ച്.ഒ എല്. സുരേഷ് ബാബുവിന്റെ നേതൃത്വത്തിലുള്ള എസ്.ഐ സാദിര് തലപ്പുഴ, എ.എസ്.ഐ ഷിദിയ ഐസക്, സി.പി.ഒമാരായ നിസാര്, റഹീസ്, റഹീം, ഷംസുദ്ദീന്, വിപിന് ദാസ്, പ്രതീഷ് എന്നിവരടങ്ങിയ പോലീസ് സംഘമാണ് പ്രതികളെ അറസ്റ്റ് ചെയ്തത്. ഇവരെ റിമാന്ഡ് ചെയ്തു.
