വൈത്തിരിയില്‍ വീടിന് ഭീഷണിയാവുന്ന രീതിയില്‍ മണ്ണിടിക്കുന്നതായി പരാതി. അറമല കോയാസ് റസിഡന്‍സിയില്‍ താമസക്കാരനായ ബീരാനാണ് പരാതിയുമായി രംഗത്തെത്തിയത്. മണ്ണിടിച്ച് സമീപമുള്ള പൊതു തോടിലേക്ക് ഇടുന്നതായും പരാതിയുണ്ട്. വൈത്തിരി പഞ്ചായത്തില്‍ വന്‍ തോതിലുള്ള മണ്ണിടിക്കല്‍ പാടില്ലെന്ന നിയമം നിലനില്‍ക്കെയാണ് ഒരേക്കറോളം കുന്നിടിച്ച് നിരത്തിയത്. കഴിഞ്ഞ പ്രളയത്തില്‍ ഏറ്റവും കൂടുതല്‍ മണ്ണിടിച്ചില്‍ ഉണ്ടായ പ്രദേശങ്ങളില്‍ ഒന്നാണിത്. സംഭവത്തെ തുടര്‍ന്ന് ബീരാന്‍ ദയാനിധി എന്നയാള്‍ക്കെതിരേ വൈത്തിരി തഹസില്‍ദാര്‍ക്കും സ്ഥലം എസ്.ഐക്കും പരാതി നല്‍കി. പരാതിയുടെ അടിസ്ഥാനത്തില്‍ വൈത്തിരി പോലീസ് സ്ഥലം സന്ദര്‍ശിക്കുകയും മണ്ണിടിക്കല്‍ നിര്‍ത്തിവെപ്പിക്കുകയും ചെയ്തു.
