കൊവിഡ് സാഹചര്യം വിലയിരുത്താന് ആരോഗ്യവകുപ്പിന്റെ അടിയന്തര യോഗം
സംസ്ഥാനത്തെ കൊവിഡ് സാഹചര്യം വിലയിരുത്താന് ആരോഗ്യമന്ത്രിയുടെ നേതൃത്വത്തില് അടിയന്തര യോഗം ചേര്ന്നു.കൊവിഡ് വ്യാപനം കുറയാത്ത സാഹചര്യത്തില് വാക്സിനേഷന് ഊര്ജിതമാക്കാന് യോഗത്തില് നിര്ദ്ദേശം നല്കി. ആരോഗ്യ മന്ത്രി വീണാ ജോര്ജ്, ആരോഗ്യ വകുപ്പ് പ്രിന്സിപ്പല് സെക്രട്ടറി, ആരോഗ്യ വകുപ്പ് ഡയറക്ടര്, ഡിഎംഒമാര് തുടങ്ങിയവര് ഓണ്ലൈനായി ചേര്ന്ന യോഗത്തിന് പങ്കെടുത്തു.ടിപിആര് 15ന് മുകളില് തുടരുന്ന സാഹചര്യത്തില് കൂടുതല് നിയന്ത്രണങ്ങള് സര്ക്കാര് പരിഗണനയിലാണ്.
സെപ്റ്റംബറോടെ എല്ലാവര്ക്കും ആദ്യ ഡോസ് വാക്സിന് ലഭ്യമാക്കണം. കൊവിഡ് ചികിത്സയില് സ്വകാര്യ ആശുപത്രികളുടെ പങ്കാളിത്തം ഉറപ്പിക്കാനും യോഗത്തില് തീരുമാനമായി. സംസ്ഥാനത്ത് രണ്ടാം തരംഗം പൂര്ത്തിയാകുന്നതിന് മുമ്പേ മൂന്നാം തരംഗം ആരംഭിക്കുമെന്ന് ആശങ്കയുടെ പശ്ചാത്തലത്തിലാണ് ആരോഗ്യ വകുപ്പ് അടിയന്തര യോഗം ചേര്ന്നത്.
അതേസമയം ഓണക്കാലത്തെ തിരക്ക് രോഗവ്യാപനത്തിനിടയാക്കിയെന്ന വിലയിരുത്തലിലാണ് ആരോഗ്യ വകുപ്പ്.മൂന്നാം തരംഗ മുന്നറിയിപ്പിന്റെ പശ്ചാത്തലത്തില് സംസ്ഥാനത്തെ ചികിത്സാ മുന്നൊരുക്കങ്ങള് യോഗം വിലയിരുത്തി. പീഡിയാട്രിക് കിടക്കകള് അടക്കം വര്ധിപ്പിക്കാന് തീരുമാനിച്ചിട്ടുണ്ട്. എന്നാല് മുഖ്യമന്ത്രിയുടെ അധ്യക്ഷതയില് ചേരുന്ന കൊവിഡ് അവലോകന യോഗത്തിലാവും ഇക്കാര്യങ്ങള് ചര്ച്ച ചെയ്യുക. ഇന്ന് ഉച്ച തിരിഞ്ഞ് മൂന്നരയ്ക്കാണ് അവലോകന യോഗം
രാജ്യത്ത് ഒക്ടോബറിലൂടെ കൊവിഡ് മൂന്നാം തരംഗം ഉണ്ടാകുമെന്ന് മുന്നറിയിപ്പ് വിദഗ്ദര് നല്കിയിരുന്നു. കുട്ടികളിലാണ് കൂടുതല് ശ്രദ്ധ പുലര്ത്തേണ്ടതെന്നും ആരോഗ്യസംവിധാനങ്ങളുടെ മെച്ചപ്പെട്ട ലഭ്യത ഉറപ്പാക്കണമെന്നും സംസ്ഥാനങ്ങള്ക്ക് നിര്ദേശമുണ്ട്.