കെപിസിസി പ്രസിഡണ്ട് കെ സുധാകരന്റെ അറസ്റ്റില്‍ പ്രതിഷേധിച്ച് യുഡിഎഫ് പ്രവര്‍ത്തകര്‍ വയനാട് ജില്ലയില്‍ വ്യാപകമായ പ്രതിഷേധമാണ് ഉയര്‍ത്തുന്നത്. മൂന്ന് താലൂക്കുകളിലും വിവിധ കേന്ദ്രങ്ങളില്‍ പ്രതിഷേധ പ്രകടനവും റോഡ് ഉപരോധവും നടന്നു.മാനന്തവാടി, ബത്തേരി, പുല്‍പ്പള്ളി,കല്‍പ്പറ്റ,ടൗണില്‍ യു.ഡി.എഫ് പ്രവര്‍ത്തകര്‍ പ്രതിഷേധ പ്രകടനവും റോഡ് ഉപരോധവും നടത്തി.
കെ പി സി സി പ്രസിഡണ്ട് കെ സുധാകരനെ അറസ്റ്റ് ചെയ്തതില്‍ പ്രതിഷേധിച്ച് കോണ്‍ഗ്രസ് സുല്‍ത്താന്‍ ബത്തേരി മണ്ഡലം കമ്മിറ്റി നേതൃത്വത്തില്‍ ബത്തേരി ടൗണില്‍ പ്രതിഷേധ പ്രകടനം നടത്തി.പ്രകടനത്തിന് മണ്ഡലം പ്രസിഡണ്ട് സതീഷ് പൂതിക്കാട്, ഡി.പി രാജശേഖരന്‍, നിസി അഹമ്മദ്, എം.കെ.ഇന്ദ്രജിത്ത്,ബാബു പഴുപ്പത്തൂര്‍, ഉമ്മര്‍ കുണ്ടാട്ടില്‍, ടി.എല്‍ സാബു, തുടങ്ങിയവര്‍ നേതൃത്വം നല്‍കി.
കെ.പി.സി.സി അധ്യക്ഷന്‍ കെ. സുധാകരന്‍ എം.പിയുടെ അറസ്റ്റില്‍ പ്രതിഷേധിച്ച് മാനന്തവാടി ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തില്‍ കോണ്‍ഗ്രസ് പ്രവര്‍ത്തകര്‍ മാനന്തവാടിയില്‍ റോഡ് ഉപരോധിച്ച് പ്രതിഷേധിച്ചു. മാനന്തവാടി ഫാര്‍മേഴ്സ് ബാങ്ക് പരിസരത്ത് നിന്ന് തുടങ്ങിയ പ്രകടനം നഗരം ചുറ്റി ഗാന്ധിപാര്‍ക്കില്‍ സമാപിച്ചു. ഗാന്ധിപാര്‍ക്കില്‍ ഇരുപത് മിനിറ്റോളം റോഡ് ഉപരോധിച്ചു. ഇതിനിടയില്‍ എത്തിയ ആംബുലന്‍സുകളെ മാത്രം കടത്തിവിട്ടു.
പ്രതിഷേധ യോഗം എ.ഐ.സി.സി.അംഗം പി.കെ. ജയലക്ഷ്മി ഉദ്ഘാടനം ചെയ്തു. ബ്ലോക്ക് കോണ്‍ഗ്രസ് കമ്മിറ്റി പ്രസിഡന്റ് എ.എം. നിഷാന്ത് അധ്യക്ഷത വഹിച്ചു. അഡ്വ.എന്‍.കെ.വര്‍ഗീസ്, പി.വി.ജോര്‍ജ്, സില്‍വി തോമസ്, ജേക്കബ് സെബാസ്റ്റിയന്‍, സി.കെ. രത്‌നവല്ലി, പി. ഷംസുദ്ദീന്‍, പി.എം. ബെന്നി, ലേഖ രാജീവന്‍, അസീസ് വാളാട്, എം.ജി. ബാബു, ബൈജു പുത്തന്‍പുരയ്ക്കല്‍, സി.എച്ച്. സുഹൈര്‍, അജ്മല്‍ വെള്ളമുണ്ട തുടങ്ങിയവര്‍ നേതൃത്വം നല്‍കി.പ്രകടനത്തിനിടയിലേക്ക് പോലീസ് വാഹനം ഇടിച്ചു കയറ്റാന്‍ ശ്രമിച്ചതായി ആരോപിച്ച് ജോസ് തിയേറ്റര്‍ കവലയില്‍ കോണ്‍ഗ്രസ് പ്രവര്‍ത്തകരും പോലീസും തമ്മില്‍ വാക്കേറ്റമുണ്ടായി. മുതിര്‍ന്ന പ്രവര്‍ത്തകര്‍ ഇടപെട്ടാണ് രംഗം ശാന്തമാക്കിയത്.
