മുഖ്യമന്ത്രിയുടെ ദുരിതാശ്വാസ നിധിയിലേക്ക് സൈക്കിള്‍ വാങ്ങാന്‍ സ്വരൂപിച്ച തുക കൈമാറിയ വിദ്യാര്‍ത്ഥിനിക്ക് കലാകാരന്‍മാരുടെ കൂട്ടായ്മ സൈക്കിള്‍ സ്നേഹ സമ്മാനമായി നല്‍കി. ബത്തേരി അസംപ്ഷന്‍ എ.യു.പി സ്‌കൂളിലെ നാലാംക്ലാസ്സ് വിദ്യാര്‍ത്ഥിനി ക്ലമന്‍സി സാറ എന്ന കൊച്ചുമിടുക്കിക്കാണ് വയനാട് ഡ്രീംസ് എന്ന കലാകാരന്‍മാരുടെ കൂട്ടായ്മ സൈക്കിള്‍ വാങ്ങി നല്‍കിയത്. കഴിഞ്ഞ നാലുവര്‍ഷമായി സൈക്കിള്‍വാങ്ങുന്നതിനായി സ്വരൂപിച്ചിരുന്ന തുകയാണ് മുഖ്യമന്ത്രിയുടെ ദുരിതാശ്വാസ നിധിയിലേക്ക് ക്ലമന്‍സി സാറ രണ്ടാഴ്ച മുന്‍പ് സബ് കലക്ടര്‍ കൈവശം നല്‍കിയത്. ഇത് ശ്രദ്ധിയില്‍പ്പെട്ട വയനാട് ഡ്രീംസ് കാലാകാരന്‍മാരാണ് ഇന്ന് അംസപ്ഷന്‍ സ്‌കൂളില്‍ നടന്ന ചടങ്ങില്‍ വെച്ച് ക്ലമന്‍സിക്ക് സൈക്കിള്‍ കൈമാറിയത്. ചടങ്ങില്‍ സ്‌കൂള്‍ എച്ച്.എം. ജോണ്‍സണ്‍ തൊഴുത്തിങ്കല്‍, വയനാട് ഡ്രീംസ് പ്രവര്‍ത്തകരായ സോണി, സുബൈര്‍ തുടങ്ങിയവര്‍ സംബന്ധിച്ചു. കോളിയാടി സ്വദേശികളായ ഇ.വി. ജോര്‍ജിന്റെയും ജിന്‍സിയുടെയും മകളാണ് ക്ലമന്‍സി.
