സൗദിയിൽ പെട്രോൾ വില കുറച്ചു. ഒക്ടോബർ 11 മുതൽ നവംബർ 10 വരെയുള്ള കാലയളവിലേക്കുള്ള പുതിയ വില സൗദി ആരാംകോ പ്രഖ്യാപിച്ചു.
91 പെട്രോളിനു 1.44 റിയാലും 95 പെട്രോളിനു 1.59 റിയാലുമായിരിക്കും പുതിയ വില. നേരത്തെ 91 പെട്രോളിനു 1.47 റിയാലും 95 പെട്രോളിനു 1.63 റിയാലുമായിരുന്നു നിരക്ക്.സൗദിയിൽ നിന്ന് വിദേശത്തേക്ക് കയറ്റു മതി ചെയ്യുന്ന എണ്ണ വില അടിസ്ഥാനമാക്കിയാണു എല്ലാ മാസവും ആഭ്യന്തര വിപണിയിലെ എണ്ണ വില പുന: നിശ്ചയിക്കാറുള്ളത്.എല്ലാ മാസവും 10 ആം തീയതി അർദ്ധരാത്രിയാണു അടുത്ത ഒരു മാസത്തേക്കുള്ള എണ്ണ വില സൗദി ആരാംകോ പ്രഖ്യാപിക്കുക.
നിലവിലെ സാഹചര്യത്തിൽ പ്രതിമാസം പെട്രോൾ വില പുന:നിശ്ചയിക്കുന്ന നടപടിക്രമം അടുത്ത സാമ്പത്തിക വർഷവും തുടരുമെന്നാണു അധികൃതർ കഴിഞ്ഞയാഴ്ച സൂചന നൽകിയിരുന്നത്.
