ആസ്പിരേഷണല്‍ ബ്ലോക്ക് പ്രോഗ്രാമിന്റെ ഭാഗമായി നടത്തുന്ന സങ്കല്പ് സപ്താഹിന്റെ ഭാഗമായുള്ള ഏഴുദിന പരിപാടികള്‍ക്ക് മാനന്തവാടി ബ്ലോക്കില്‍ തുടക്കമായി.എടവക ഗ്രാമ പഞ്ചായത്തില്‍ നടത്തിയ സ്വാസ്ഥ്യ മേളയോടെയാണ് സങ്കല്പ് സപ്താഹിന് തുടക്കമായത്.ആസ്പിരേഷണല്‍ ബ്ലോക്ക് പ്രോഗ്രാമില്‍ ജില്ലയിലെ 4 ബ്ലോക്ക് പഞ്ചായത്തുകളെയാണ് ഉള്‍പ്പെടുത്തിയിട്ടുള്ളത്.ആസ്പിരേഷണല്‍ ബ്ലോക്കുകളില്‍ വിവിധ മേഖലകളില്‍ മികച്ച പ്രവര്‍ത്തനം നടത്തുന്നതിന് നീതി ആയോഗ് നടപ്പാക്കുന്ന പദ്ധതിയാണ് സങ്കല്പ് സപ്താഹ്. എടവക കുടുംബാരോഗ്യ കേന്ദ്രത്തില്‍ മേള ബ്ലോക്ക് പഞ്ചായത്ത് പ്രസിഡണ്ട് ജസ്റ്റിന്‍ ബേബി ഉദ്ഘാടനം ചെയ്തു
ആരോഗ്യ രംഗത്ത് മികവുറ്റ പ്രവര്‍ത്തനങ്ങള്‍ നടത്തുന്നതിന് വേണ്ടിയാണ് സ്വാസ്ഥ്യ മേള സംഘടിപ്പിക്കുന്നത്.മേളയുടെ ഭാഗമായി ബ്ലോക്ക് പരിധിയിലെ എല്ലാ സര്‍ക്കാര്‍ ആശുപത്രികളിലും എച്ച്.ബി സ്‌ക്രീനിംഗ്,ഗര്‍ഭിണികള്‍ക്കുള്ള ആന്റിനേറ്റല്‍ ക്ലിനിക്ക്,ജീവിത ശൈലി രോഗനിര്‍ണ്ണയത്തിനുള്ള എന്‍.സി.ഡി ക്ലിനിക്ക്,ടി.ബി സ്‌ക്രീനിംഗ്,ഗര്‍ഭിണികള്‍ക്കുള്ള ബോധവത്ക്കരണ ക്ലാസ്സുകള്‍ തുടങ്ങിയവ സംഘടിപ്പിച്ചു.7 ദിവസങ്ങളിലും മേളയുടെ ഭാഗമായി ബ്ലോക്ക് പരിധിയിലെ വിവിധ തദ്ദേശ,സര്‍ക്കാര്‍ സ്ഥാപനങ്ങളില്‍ വിവിധ മേഖലകളില്‍ ക്യാമ്പുകളും,ബോധവത്ക്കരണ ക്ലാസുകളും സംഘടിപ്പിക്കും
ബ്ലോക്ക് പഞ്ചായത്ത് വൈസ് പ്രസിഡണ്ട് എ.കെ ജയഭാരതി, ബ്ലോക്ക് സ്റ്റാന്‍ഡിംഗ് കമ്മിറ്റി ഭാരവാഹികളായ കെ.വി വിജോള്‍,പി കല്യാണി,സല്‍മ മോയിന്‍,ഗ്രാമ പഞ്ചായത്ത് സ്റ്റാന്‍ഡിംഗ് കമ്മിറ്റി ഭാരവാഹികളായ ശിഹാബുദ്ദീന്‍ അയാത്ത്,ജോര്‍ജ് പടകൂട്ടില്‍,ജെന്‍സി ബിനോയ്,വെള്ളമുണ്ട ഗ്രാമപഞ്ചായത്ത് ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ സി.എം അനില്‍ കുമാര്‍, ബ്ലോക്ക് മെമ്പര്‍ വി ബാലന്‍, വാര്‍ഡ് മെമ്പര്‍മാരായ അഹമ്മദ്കുട്ടി ബ്രാന്‍, സി സുജാത,ഗിരിജാ സുധാകരന്‍, ഹെല്‍ത്ത് ഇന്‍സ്‌പെക്ടര്‍ പി മഞ്ജുനാഥ്,മെഡിക്കല്‍ ഓഫീസര്‍ ഡോ.പുഷ്പ തുടങ്ങിയവര്‍ സംസാരിച്ചു.ജനപ്രതിനിധികള്‍, ആരോഗ്യ പ്രവര്‍ത്തകര്‍,അംഗണ്‍വാടി പ്രവര്‍ത്തകര്‍,ആശാ പ്രവര്‍ത്തകര്‍ തുടങ്ങിയവര്‍ നേതൃത്വം നല്‍കി.
