വൈത്തിരി: കുന്നിന്‍മുകളില്‍ നിന്നും കാല്‍ തെറ്റി താഴേക്ക് പതിച്ച മാനിനെ രക്ഷപ്പെടുത്താനുള്ള പൊലീസ് ശ്രമം വിഫലമായി. രാവിലെ പൂക്കോട് വെറ്ററിനറി സര്‍കലാശാല കുന്നില്‍ നിന്നും മാന്‍ ഉരുണ്ടുവീഴുന്നത് കണ്ട ലോറി യാത്രക്കാരാണ് ഇക്കാര്യം പൊലീസിനെ അറിയിച്ചത്. പട്രോളിങ്ങിന് പോകുകയായിരുന്ന വൈത്തിരി പോലീസ് രക്ഷാ നടപടികള്‍ക്കായി സ്ഥലത്തെത്തി. ഇരുപതടി ഉയരത്തില്‍ മാന്‍ കുടുങ്ങിക്കിടക്കുന്നത് കണ്ട ഇവര്‍ പ്രദേശവാസിയായ കൃഷ്ണന്‍കുട്ടിയുടെ സഹായത്തോടെ മാനിനെ കയറുകെട്ടി താഴെ ദേശീയപാതയോരത്തെത്തിച്ചു. തൊട്ടടുത്തുള്ള പൂക്കോട് മൃഗാശുപത്രിയില്‍ നിന്നും ഡോക്ടര്‍മാര്‍ എത്തുമ്പോഴേക്കും മാന്‍ ചത്തു. മാനിന്റെ ജഡം പൂക്കോട് മൃഗാശുപത്രിയിലേക്ക് പോസ്റ്റുമോര്‍ട്ടത്തിനായി കൊണ്ടുപോയി.
