പൊന്നുവിളയുന്ന മണ്ണുണ്ടെങ്കിലും അതില്‍ ഒന്നും വിളയിക്കാനാവാത്ത അവസ്ഥയിലാണ് ജില്ലയിലെ വനാതിര്‍ത്തി ഗ്രാമങ്ങളിലെ കര്‍ഷകര്‍. പട്ടയ ഭൂമിയും ലീസ് ഭൂമിയും തരിശായി ഇടേണ്ട അവസ്ഥയാണ് കര്‍ഷകര്‍ക്ക് സംജാതമായിരിക്കുന്നത്. അതിരൂക്ഷമായ വന്യമൃഗ ശല്യമാണ് കര്‍ഷകരെ പ്രതിസന്ധിയിലാക്കുന്നത്. എന്തെങ്കിലും വിളയിക്കണമെങ്കില്‍ രാപ്പകല്‍ വ്യത്യാസമില്ലാതെ കാവല്‍ നില്‍ക്കേണ്ട ഗതികേടിലാണ് കര്‍ഷകര്‍. കൃഷി ഇറക്കാനാവാതെ വന്നതോടെ ഉപജീവനത്തിനായി കര്‍ഷകര്‍ വളര്‍ത്തുമൃഗങ്ങളെയാണ് ആശ്രയിക്കുന്നത്. എന്നാല്‍ കടുവ, പുലി അടക്കമുള്ള വന്യമൃഗശല്യം കൂടിയതോടെ ഇതും പ്രതിസന്ധിയിലായിരിക്കുകയാണ്.
