ക്രിസ്തുമസ് പുതുവത്സര സ്‌പെഷ്യല്‍ ഡ്രൈവിന്റെ ഭാഗമായി ജില്ലാ എക്‌സൈസ് സ്‌പെഷ്യല്‍ സ്‌ക്വാഡ് പൊന്‍കുഴിയില്‍ നടത്തിയ വാഹന പരിശോധനയില്‍ അതിമാരകമയക്കുമരുന്നായ എംഡിഎംഎയുമായി യുവാക്കള്‍ അറസ്റ്റില്‍. കോഴിക്കോട് സ്വദേശികളായ താമരശ്ശേരി നരിക്കുനി തീയ്യകണ്ടിയില്‍ വീട്ടില്‍ ജ്യോതിഷ് (28), കാക്കൂര്‍ പുന്നശ്ശേരി അമ്പലമുക്ക് തോട്ടത്തില്‍ വീട്ടില്‍ ജാബിര്‍ (28) എന്നിവരാണ് അറസ്റ്റിലായത്. ഇരുവരില്‍ നിന്നും 108 ഗ്രാം എം ഡി എം എ കണ്ടെടുത്തു. മൈസൂരില്‍ നിന്നുമെത്തിയ കര്‍ണാടക ആര്‍ടിസി ബസില്‍ നിന്നുമാണ് ഇരുവരെയും പിടികൂടിയത്. ഒരാളുടെ പോക്കറ്റില്‍ നിന്നും മറ്റൊരാളുടെ ബാഗില്‍ നിന്നുമാണ് മയക്കുമരുന്ന് കണ്ടെടുത്തത്.കോഴിക്കോട്ട് എത്തിച്ച് വിതരണം നടത്തുന്നതിനായാണ് എം ഡി എം എ കൊണ്ടുവന്നതെനാണ് ചോദ്യം ചെയ്തതില്‍ നിന്നും മനസിലായതെന്ന് എക്‌സൈസ് അധികൃതര്‍ അറിയിച്ചു.ജില്ലാ എക്‌സൈസ് സ്‌പെഷ്യല്‍ സ്‌കോഡ് സര്‍ക്കിള്‍ ഇന്‍സ്‌പെക്ടര്‍ ടി ആര്‍ ഹരിനന്ദനന്റെ നേതൃത്വത്തില്‍ പ്രിവന്റീവ് ഓഫീസര്‍മാരായ എം.ബി. ഹരിദാസന്‍ , കെ .വി .പ്രകാശന്‍ , സിവില്‍ എക്‌സൈസ് ഓഫീസര്‍മാരായ സി അന്‍വര്‍, കെ ആര്‍ ധന്വന്ദ്, ഡ്രൈവര്‍ അന്‍വര്‍ കളോളി എന്നിവരാണ് പരിശോധന നടത്തിയത്
