തരുവണ പുലിക്കാട് കണ്ടിയില്‍ പൊയില്‍ മഫീദയുടെ ദുരൂഹ മരണത്തില്‍ ഉത്തരവാദികളായ മുഴുവന്‍ പേരെയും അറസ്റ്റ് ചെയ്യണമെന്ന് മഫീദയുടെ മകനും ആക്ഷന്‍ കമ്മിറ്റി ഭാരവാഹികളും കല്‍പ്പറ്റയില്‍ വാര്‍ത്താ സമ്മേളനത്തില്‍ ആവശ്യപ്പെട്ടു. മുഫീദയുടെ ജീവന്‍ രക്ഷിക്കാന്‍ ശ്രമിക്കാതെ നോക്കി നിന്നവര്‍ക്കെതിരെയും നടപടി വേണം .കുറ്റവാളികള്‍ക്കെതിരെ നടപടി ഇല്ലങ്കില്‍ പ്രക്ഷോഭം നടത്തുമെന്നും ഇവര്‍ പറഞ്ഞു. മഫീദ മരണപ്പെട്ടിട്ട് ഒരാഴ്ച കഴിഞ്ഞിട്ടും ഒരു പ്രതികളെ പോലും ഇത് വരെയും അറസ്റ്റ് ചെയ്തിട്ടില്ല.നാല് മക്കളുള്ള മുഫീദ വിധവ ആയതിന് ശേഷം ഇവരുടെ ദാരിദ്രവും പട്ടിണിയും മുതലാക്കി കുടുംബത്തിന് സംരക്ഷണം നല്‍കാം എന്ന് വിശ്വസിപ്പിച്ച് നാട്ടിലെ പ്രമാണിയായ ഹമീദ് മഫീദയുമായി അടുപ്പത്തിലാവുകയും ഇവരെ രഹസ്യമായി പുനര്‍വിവാഹം ചെയ്യുകയും ചെയ്തു.
എന്നാല്‍ പിന്നീട് ഹമീദിന്റെ ഭാര്യയും മക്കളും വിവരം അറിഞ്ഞതോടെ നാട്ടിലെ ഉന്നത സ്ഥാനത്തിരിക്കുന്നവരുടെ സഹായത്തോടെ ഹമീദും കുടുംബവും മഫീദയെ ബന്ധത്തില്‍ നിന്നും പിന്‍തിരിയാന്‍ നിരന്തരമായി ഭീഷണിപ്പെടുത്തി കൊണ്ടിരുന്നു.കഴിഞ്ഞ ജൂലൈയ് മൂന്നിന് രാത്രി ഹമീദിന്റെ മകന്‍ ജാബിറും അനുജന്‍ നാസറും ഹമീദിനേയും കൂട്ടി മഫീദയുടെ വീട്ടില്‍ വരുകയും ഇയാളുമായുള്ള ബന്ധം ഒഴിവാക്കുവാന്‍ ഭീഷണിപ്പെടുത്തുകയും ചെയ്തു.വീട്ടിലേക്ക് ഇങ്ങനെ വരുന്ന വിവരം മുന്‍കൂട്ടി ഹമീദ് മഫീദയെ വിളിച്ച് അറിയിക്കുകയും വരുന്നവരെ പേടിപ്പിക്കുന്നതിനു വേണ്ടി മണ്ണെണ ഒഴിച്ച് തീകൊളുത്തുമെന്ന് പറയുവാന്‍ പറഞ്ഞിരുന്നു.അത് വിശ്വസിച്ചാണ് മഫീദ തീ കൊളുത്തിയത്.
എന്നാല്‍ തീപടരുമ്പോള്‍ തീ അണക്കുവാനോ മഫീദയെ രക്ഷിക്കൂവാനോ വന്നവര്‍ തയ്യാറായില്ല. ഇത് തികച്ചും കാടത്തരവും മനുഷ്യത്വമില്ലാത്തതുമാണ്. മഫീദ തീ കൊളുത്തുമ്പോള്‍ പ്രോല്‍സാഹിപ്പിക്കുകയാണ് വന്നവര്‍ ചെയ്തത്. അപകടം പറ്റിയ മഫീദയെ ആശുപത്രിയില്‍ കൊണ്ട് പോകുമ്പോള്‍ വാഹനത്തില്‍ വെച്ച് ഇവര്‍ ഭീഷണിപ്പെടുത്തിയതിനാലാണ് മഫീദ ഇവര്‍ക്കെതിരെ മരണ മൊഴി കൊടുക്കാതിരുന്നത്.കഴിഞ്ഞ സെപ്റ്റംബര്‍ 2 ന് മഫീദ വിദഗ്ധ ചികില്‍സ കിട്ടാതെ വീട്ടില്‍ വെച്ച് ദാരുണമായി മരണത്തിനു കീഴടങ്ങി.
എല്ലാ ചികിത്സാ ചെലവുകളും ഏറ്റെടുക്കാം എന്ന് പറഞ്ഞ ഹമീദ് പിന്‍ വാങ്ങിയതോടെയാണ് മെഡിക്കല്‍ കോളേജിലെ ചികില്‍സ മതിയാക്കി വീട്ടിലേക്ക് വന്നത്.യു.പി യിലും ഉത്തരേന്ത്യയിലും നടക്കുന്ന പീഡനവും ദുരിതവുമാണ് ഈ കുടുംബം ഏറ്റുവാങ്ങേണ്ടി വന്നതെന്ന് ഇവര്‍ പറഞ്ഞു.തീ കൊളുത്തുന്ന സമയത്തും അല്ലാതെയും ഈ ബന്ധം അവസാനിപ്പിക്കാന്‍ നാട്ടില്‍ ഉന്നത സ്ഥാനത്തിരിക്കുന്ന പലരും സമീപിച്ചിരുന്നു എന്ന് മഫീദ തന്നെയും ഹമീദും പറയുന്ന വോയ്‌സ് മെസേഞ്ച് പുറത്ത് വന്നതോടെ ഇവരുടെ സ്വാധീനത്താല്‍ കേസ്സ് തേച്ച് മാച്ചുകളയാന്‍ ഉന്നത നീക്കം നടക്കുന്നതായും പോലീസ് നിഷ്‌ക്രിയമായതായും സംശയിക്കുന്നു.മഫീദ മരണപ്പെട്ടിട്ട് ഒരാഴ്ച കഴിഞ്ഞിട്ടും ഒരു പ്രതികളെ പോലും ഇത് വരെയും അറസ്റ്റ് ചെയ്തിട്ടില്ല. മഫീദയുടെ കുടുംബത്തിന് നീതി ലഭിക്കും വരെയും നീതിക്കായി പോരാടുമെന്നും പോലീസ് സ്റ്റേഷന്‍ സമരമുള്‍പ്പെടെ സംഘടിപ്പിക്കുവാന്‍ പുലിക്കാട് നിവാസികള്‍ പങ്കെടുത്ത യോഗം തീരുമാനിച്ചതായും ഇവര്‍ പത്രസമ്മേളനത്തില്‍ വ്യക്തമാക്കി.നാട്ടിലെ സമ്പന്ന കുടുംബത്തിന്റെ ദുരഭിമാനം സംരക്ഷിക്കാന്‍ അവരോടൊപ്പം ചേര്‍ന്ന് തീര്‍ത്തും ദരിദ്രരും ആരാരുമില്ലാത്ത മഫീദയെ ഭീഷണിപ്പെടുത്തുവാന്‍ പങ്കാളികളായവര്‍ക്കെതിരെ നടപടി സ്വീകരിക്കണം. മുഫീദ തീ കൊളുത്തുന്ന രംഗത്തിന്റെ വീഡിയോയും മറ്റ് ഡിജിറ്റല്‍ തെളിവുകളും പുറത്ത് വന്നിട്ടും പോലീസ് കുറ്റവാളികള്‍ക്കെതിരെ യാതൊരു നടപടിയും സ്വീകരിക്കാത്തത് സാക്ഷര കേരളത്തിന് അഭമാനമാണെന്നും പത്രസമ്മേളനത്തില്‍ പങ്കെടുത്തവര്‍ പറഞ്ഞു.പത്രസമ്മേളനത്തില്‍ ആക്ഷന്‍ കമ്മിറ്റി ചെയര്‍മാനും വാര്‍ഡ് മെമ്പറുമായ കെ. നിസാര്‍, കണ്‍വീനര്‍ പി.ജമാല്‍, ട്രഷറര്‍ സി.ഹാരിസ് മഫീദയുടെ മകന്‍ സാദിഖും എന്നിവര്‍ പങ്കെടുത്തു.
