മഹാമാരികള്‍ പടര്‍ന്നു പിടിക്കുന്ന ഈ കെട്ടകാലത്ത് കൈകഴുകലിന് വലിയ പ്രാധാന്യമാണ് കല്‍പിക്കപ്പെട്ടിരിക്കുന്നത്. കോവിഡ് സൃഷ്ടിച്ച പ്രതിസന്ധി ഘട്ടത്തില്‍ നിന്നും നാം ഇനിയും മോചിതമായിട്ടില്ല. ഈ വേളയിലാണ് മറ്റൊരു ലോക കൈകഴുകല്‍ ദിനം കൂടി ചര്‍ച്ച ചെയ്യപ്പെടുന്നത്. ഒക്ടോബര്‍ 15 നാണ് എല്ലാ വര്‍ഷവും ലോക കൈകഴുകല്‍ ദിനം ആചരിക്കുന്നത്.
രോഗാണുക്കള്‍ പ്രധാനമായും പടരുന്നത് നമ്മുടെ കൈകളിലൂടെയാണ്. അണുബാധ പടരാതിരിക്കാനും ആളുകളെ ആരോഗ്യത്തോടെ നിലനിര്‍ത്താനുമുള്ള ഏറ്റവും പ്രധാനപ്പെട്ട മാര്‍ഗ്ഗമാണ് കൈ കഴുകല്‍. ഇതിന്റെ അടിസ്ഥാനത്തിലാണ് ലോകാരോഗ്യ സംഘടന (ഡബ്ല്യുഎച്ച്ഒ) കൈ കഴുകല്‍ ദിനാചരണം ലോകമെമ്പാടും ആചരിക്കാന്‍ ആഹ്വാനം ചെയ്യുന്നത്.
ടോയ്‌ലറ്റില്‍ പോയതിനു ശേഷവും ഭക്ഷണം കഴിക്കുന്നതിന് മുന്‍പും കൈകഴുകല്‍ ശീലമാക്കുന്നത് കുട്ടികള്‍ക്ക് വയറിളക്കം വരാനുള്ള സാധ്യത 40% ല്‍ കൂടുതല്‍ കുറയ്ക്കുമെന്ന് യൂനിസെഫിന്റെ പഠനങ്ങള്‍ തെളിയിക്കുന്നു. കോവിഡ് -19 നെ പ്രതിരോധിക്കുന്നതിന്റെ ഭാഗമായി കൈകഴുകുന്നത് കോവിഡ് -19 അണുബാധയ്ക്കുള്ള സാധ്യത 36 ശതമാനം കുറയ്ക്കാന്‍ സാധ്യതയുണ്ടെന്നും തെളിയിക്കപ്പെട്ടിരിക്കുന്നു.
എല്ലാ വര്‍ഷവും വ്യത്യസ്ത പ്രമേയങ്ങളോടെയാണ് ലോക കൈകഴുകല്‍ ദിനാചരണം സംഘടിപ്പിക്കുന്നത്. ഈ വര്‍ഷത്തെ വിഷയം ‘നമ്മുടെ കൈകളിലാണ് ഭാവി- നമുക്ക് ഒരുമിച്ച് മുന്നേറാം’ എന്നതാണ്. വെള്ളം കൊണ്ട് മാത്രം കഴുകിയാല്‍ കൈകള്‍ ശുദ്ധമാകുകയില്ല. അതിനാല്‍ സോപ്പ് കൊണ്ട് കൈ കഴുകുന്നതാണ് ഏറ്റവും ചെലവു കുറഞ്ഞ മാര്‍ഗം. അഴുക്കിനേയും എണ്ണയേയും കഴുകിക്കളഞ്ഞ് രോഗാണുക്കളെ നശിപ്പിക്കാന്‍ ഇതിലൂടെ കഴിയുന്നു. കുട്ടികളെ ചെറിയ പ്രായം മുതല്‍ ഫലപ്രദമായി കൈകഴുകുന്ന വിധം പഠിപ്പിക്കേണ്ടതാണ്.
നിങ്ങളുടെ കൈകള്‍ എങ്ങനെ ശരിയായി കഴുകാം:
ലോകാരോഗ്യ സംഘടന അംഗീകരിച്ച, 11 സ്റ്റെപ്പ് കൈകഴുകല്‍ മാര്‍ഗങ്ങള്‍ ഇവയാണ്…
1. കൈകള്‍ വെള്ളത്തില്‍ നനയ്ക്കുക
2. കൈയുടെ എല്ലാ ഭാഗങ്ങളിലും ആവശ്യത്തിന് സോപ്പ് പുരട്ടുക
3. കൈപ്പത്തികള്‍ പരസ്പരം ഉരയ്ക്കുക
4. ഇടത് കൈയ്ക്ക് മുകളില്‍ വലത് കൈപ്പത്തി വയ്ക്കുക, വിരലുകള്‍ പരസ്പരം ബന്ധിപ്പിച്ച് ഉരയ്ക്കുക. ഈ പ്രവര്‍ത്തനം തിരിച്ചും ചെയ്യുക.
5. കൈപ്പത്തി താഴേക്കും മുകളിലേക്കും നന്നായി ഉരയ്ക്കുക
6. വിരലുകളുടെ പിന്‍ഭാഗത്ത് ഉരയ്ക്കുക
7. ഇടത്, വലത് തള്ളവിരലുകള്‍ ഉരയ്ക്കുക
8. കൈപ്പത്തികള്‍ ചുറ്റി തിരുമുക
9. കൈപ്പത്തികള്‍ വെള്ളത്തില്‍ കഴുകുക
10. വൃത്തിയുള്ള തൂവാല കൊണ്ട് കൈകള്‍ നന്നായി തുടയ്ക്കുക
11. നനഞ്ഞ തൂവാല ഉണക്കി സൂക്ഷിക്കുക
