കോഴിക്കോട് വാഹന ഷോറൂമില്‍ നിന്നും മോഷ്ടിച്ച കാര്‍ കല്‍പ്പറ്റയില്‍ ഉപേക്ഷിച്ച നിലയില്‍ കണ്ടെത്തി.ഇന്ന് ഉച്ചയ്ക്ക് ഒരുമണിയോടെയാണ് കോഴിക്കോട് വെസ്റ്റ്ഹില്ലിലെ കാര്‍ ഷോറൂമില്‍ നിന്നും 44 ലക്ഷം രൂപ വിലമതിക്കുന്ന കാര്‍ണിവല്‍ ലിമോസിന്‍ കാര്‍ മോഷണം പോയത്.കാറില്‍ ഘടിപ്പിച്ചിരുന്ന ജിപിഎസ് വഴിയാണ് കാര്‍ വയനാട്ടില്‍ എത്തിയതായി വിവരം ലഭിച്ചത്.പോലീസ് സ്ഥലത്തെത്തിയപ്പോള്‍ കല്‍പ്പറ്റ പിണങ്ങോട് റോഡില്‍ കാര്‍ ഉപേക്ഷിച്ച നിലയില്‍ കണ്ടെത്തി.ഫിംഗര്‍പ്രിന്റ് ബ്യൂറോ വിരലടയാളം പരിശോധിച്ചു തെളിവുകള്‍ എടുത്തിട്ടുണ്ട്.ഷോറൂമില്‍ നിന്നും വാഹനം മോഷ്ടിക്കുന്ന ദൃശ്യങ്ങള്‍ സിസിടിവിയില്‍ പതിഞ്ഞിട്ടുണ്ട്.കാര്‍ മോഷ്ടിച്ചയാളെ തിരിച്ചറിഞ്ഞിട്ടില്ല.
