മാനന്തവാടി മട്ടന്നൂര്‍ എയര്‍പോര്‍ട്ട് റോഡ്;പരാതികള്‍ റവന്യൂ അധികാരികള്‍ നേരിട്ടെത്തി പരിശോധിക്കണമെന്ന് വ്യാപാരി വ്യവസായി സമിതി ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു.
വികസനത്തിന് സര്‍വ്വ പിന്തുണയുമേകും, നിര്‍ദ്ധിഷ്ട എയര്‍ പോര്‍ട്ട് റോഡിനായുള്ള പ്രവര്‍ത്തനങ്ങള്‍ ആരംഭിക്കുന്നതിനു മുന്നേ, എയര്‍ പോര്‍ട്ട് റോഡിന്റെ വരവില്‍ ആശങ്കയുണ്ട്. ഏറ്റവും കൂടുതല്‍ ആശങ്കയുള്ളതും ഏറ്റവുമധികം ബാധിക്കുന്നതും വ്യാപാരികളെയാണ്. മാനന്തവാടി ഗാന്ധി പാര്‍ക്കാണ് സീറോ പോയിന്റായി കണക്കാക്കിയിട്ടുള്ളത്.
മാനന്തവാടി ടൗണ്‍ മുതല്‍ 24 മീറ്റര്‍ വീതിയില്‍ റോഡ് വരുമ്പോള്‍ വ്യാപാര സ്ഥാപനങ്ങളടക്കം നിരവധി ഒഴിപ്പിക്കലുകള്‍ ആവശ്യമായി വരും.മാനന്തവാടി പട്ടണമടക്കമുള്ള വ്യാപാര കേന്ദ്രങ്ങളില്‍ 15 മീറ്ററാക്കി കുറക്കുകയാണെങ്കില്‍ നൂറുകണക്കിന് ആളുകളുടെ ഉപജീവനമാര്‍ഗം തടസപ്പെടില്ല,തവിഞ്ഞാല്‍ പഞ്ചായത്തില്‍ എസ് വളവ് മുതല്‍ പഞ്ചായത്ത് ഓഫീസ് വരെയുള്ള ഭാഗം വലത് വശം വരെയുള്ള നാല് കിലോമീറ്റര്‍ ദൂരത്തില്‍ കുടിയൊഴിപ്പിക്കലുകളില്ലാതെ നാലുവരിപ്പാത നിര്‍മ്മിക്കാനാകും.
മാനന്തവാടി ഗാന്ധി പാര്‍ക്ക് സീറോ പോയിന്റായി കണക്കാക്കാതെ ടൗണിനു പുറത്ത് എരുമത്തെരുവ് സീറോ പോയിന്റായി കണക്കാക്കി ഗാന്ധി പാര്‍ക്ക് വരെയുള്ള ഒരു കിലോമീറ്റര്‍ റോഡ് മലയോര ഹൈവേയില്‍ ഉള്‍പ്പെടുത്തി വികസിപ്പിക്കാവുന്നതാണ്. എയര്‍പോര്‍ട്ട് റോഡ് പ്രവര്‍ത്തികള്‍ അടിയന്തിരമായി ആരംഭിക്കുകയും പൊതു ജനങ്ങളുടെ ആശങ്ക പരിഹരിക്കുകയും വേണം. റവന്യൂ അധികൃതര്‍ നേരിട്ട് സ്ഥലത്തെത്തി പരാതികള്‍ കേള്‍ക്കുവാന്‍ തയ്യാറാകണമെന്നും വ്യാപാരി വ്യവസായി സമിതി ആവശ്യപ്പെട്ടു. പത്രസമ്മേളനത്തില്‍ കെ പി ശ്രീധരന്‍, ടി സുരേന്ദ്രന്‍ ,എം ആര്‍ സുരേഷ്, പി അബ്ദുള്‍ മുത്തലിബ് ,കെ നജ്മുദ്ധീന്‍,കെ ഇല്യാസ് എന്നിവര്‍ പങ്കെടുത്തു.
