വയനാടിന്റെ കാര്‍ഷികോത്സവമായ പൂപ്പൊലിക്ക് ഒരുക്കങ്ങള്‍ പൂര്‍ത്തിയായതായി സംഘാടകര്‍ കല്‍പ്പറ്റയില്‍ വാര്‍ത്ത സമ്മേളനത്തില്‍ അറിയിച്ചു.പങ്കെടുക്കുന്നവരുടെ പ്രയോജനത്തിനായി സെമിനാറുകള്‍, കര്‍ഷക-ശാസ്ത്രജ്ഞര്‍ തമ്മിലുള്ള ആശയവിനിമയം, അഗ്രോ ക്ലിനിക്ക് തുടങ്ങിയ സാങ്കേതിക സെഷനുകളും നടത്തും. സംയോജിത കൃഷി സമ്പ്രദായം-വയനാടിന്റെ സാധ്യതകള്‍, ഭക്ഷ്യസുരക്ഷയ്ക്കുള്ള മില്ലറ്റുകള്‍, മില്ലറ്റുകളുടെ സംസ്‌കരണവും മൂല്യവര്‍ദ്ധനയും, കൃത്യത കൃഷിയുടെ എഞ്ചിനീയറിംഗും കൃഷി വശങ്ങളും അവോക്കാഡോയുടെ മൂല്യവര്‍ദ്ധന, ഇറക്കുമതി ചെയ്ത ഫല സസ്യങ്ങളുടെ കൃഷി സാധ്യതകള്‍, ക്ഷീര കന്നുകാലി പരിപാലനം, കോഴി വളര്‍ത്തലിലൂടെയുള്ള സംരംഭകത്വ വികസനം, കാലാവസ്ഥയെ പ്രതിരോധിക്കുന്ന കൃഷിരീതികള്‍, ചെറുകിട കാര്‍ഷിക യന്ത്രവല്‍ക്കരണത്തിന്റെ സാധ്യതകള്‍, നെല്ലിലെ മാലിന്യ സംസ്‌കരണം, വയനാട്ടിലെ പുഷ്പകൃഷിയുടെ സാധ്യതകള്‍, വയനാട്ടിലെ പുഷ്പ വിളകളുടെ കയറ്റുമതി സാധ്യതകള്‍, കുരുമുളക് കൃഷിയിലെ പുതിയ പ്രവണതകള്‍, സുഗന്ധവ്യഞ്ജനങ്ങളുടെ മൂല്യവര്‍ദ്ധന, കിഴങ്ങുവിളകളിലൂടെയുള്ള ഭക്ഷ്യസുരക്ഷ എന്നിവ സെമിനാര്‍ വിഷയങ്ങളില്‍ ഉള്‍പ്പെടുത്തിയിട്ടുണ്ട്.
സാഹസിക വിനോദങ്ങളില്‍ ഏര്‍പ്പെടാനും, പൂക്കളമൊരുക്കല്‍, പെറ്റ് ഷോ, കുക്കറി ഷോ തുടങ്ങി വിവിധ മത്സരങ്ങളില്‍ പങ്കെടുക്കാനും ഫുഡ് കോര്‍ട്ടില്‍ നിന്ന് നാടന്‍ വിഭവങ്ങള്‍ ആസ്വദിക്കാനും സന്ദര്‍ശകര്‍ക്ക് അവസരം ലഭിക്കും. ഒരു ഹെക്ടര്‍ വിസ്തൃതിയിലാണ് അമ്യൂസ്‌മെന്റ് പാര്‍ക്ക് സജ്ജീകരിച്ചിരിക്കുന്നത്. കൂടാതെ വൈവിധ്യമാര്‍ന്ന സാംസ്‌കാരിക പരിപാടികളും പുഷ്പമേളയ്ക്ക് കൂടുതല്‍ ചാരുത പകരും. എല്ലാ ദിവസവും വൈകീട്ട് 4.30 മുതല്‍ രാത്രി 10.00 വരെ നീണ്ടുനില്‍ക്കുന്ന കലാ സാംസ്‌കാരിക പരിപാടികള്‍ മേളക്ക് മാറ്റ് കൂട്ടുമെന്നും സംഘാടകര്‍.
സന്ദര്‍ശകരുടെ സൗകര്യം വര്‍ധിപ്പിക്കാന്‍ ടിക്കറ്റ് കൗണ്ടര്‍ യൂണിറ്റുകള്‍ വര്‍ധിപ്പിച്ചിട്ടുണ്ട്. ആര്‍എആര്‍എസ് പരിസരത്ത് മൂന്ന് പൂപ്പൊലി ടിക്കറ്റ് യൂണിറ്റുകള്‍ പ്രവര്‍ത്തിക്കും പൂപ്പൊലി പൂന്തോട്ടത്തിന് മുന്നില്‍, ആര്‍എആര്‍എസ് റെസ്റ്റ് ഹൗസ്- ചുള്ളിയോട് റോഡ്, ഫാര്‍മേഴ്‌സ് മാള്‍ ഓഫ് ഐസിഎആര്‍ കെവികെ വയനാട് വടുവന്‍ചാല്‍ റോഡ്). കൂടാതെ, സുല്‍ത്താന്‍ ബത്തേരിയിലെ കെഎസ്ആര്‍ടിസി ബസ് ഡിപ്പോയില്‍ ഒരു ടിക്കറ്റ് വിതരണ യൂണിറ്റും പ്രവര്‍ത്തിക്കും. ഈ യൂണിറ്റുകളിലെല്ലാം ഓണ്‍ലൈന്‍ പേയ്‌മെന്റിനുള്ള സൗകര്യവുമുണ്ട്. ആര്‍ എ ആര്‍ എസ് മെയിന്‍ ഓഫീസിനുള്ളില്‍ ടിക്കറ്റുകള്‍ ഒരുമിച്ച് ബുക്ക് ചെയ്യാനുള്ള സൗകര്യവും ഒരുക്കിയിട്ടുണ്ട് . പൂപ്പൊലി ദിവസങ്ങളില്‍ ഉടനീളം വയനാട് ജില്ലാ മെഡിക്കല്‍ ഓഫീസറുടെ നേതൃത്ത്വത്തില്‍ ഒരു മെഡിക്കല്‍ ക്യാമ്പ് പ്രവര്‍ത്തിക്കും .
കോഴിക്കോട്, കണ്ണൂര്‍ ഉള്‍പ്പെടെയുള്ള സമീപ ജില്ലകളില്‍ നിന്ന് കെഎസ്ആര്‍ടിസി സ്‌പെഷല്‍ ബസ് സര്‍വീസുകളും നടത്തുന്നുണ്ട്. പൂപ്പൊലി 2023 വേദികളായ ബത്തേരി, മാനന്തവാടി, പനമരം, കല്‍പ്പറ്റ എന്നിവിടങ്ങളിലേക്ക് സന്ദര്‍ശകരുടെ സൗകര്യാര്‍ത്ഥം ജില്ലയുടെ വിവിധ ഭാഗങ്ങളില്‍ നിന്ന് കോഴിക്കോട്, പാലക്കാട് കെഎസ്ആര്‍ടിസി ബസുകള്‍ സര്‍വീസ് നടത്തുമെന്ന് ഇവര്‍ പറഞ്ഞു.എ.ഡി. ആര്‍. ഡോ.കെ. അജിത്ത് കുമാര്‍, ഡോ.രാജശ്രീ, ഡോ.വി. ശ്രീറാം, എം.ശ്രീരേഖ എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.
