കല്‍പ്പറ്റ: ജനതാദള്‍ (എസ്) സംസ്ഥാന വൈസ് പ്രസിഡണ്ട് പി.എം ജോയി പാര്‍ട്ടി വിട്ട് സി.പിഐയിലേക്കെന്ന് സൂചന. ചര്‍ച്ച നടന്നതായാണ് വിവരം. പി.എം ജോയി വിഭാഗത്തിന്റെ ലയനം വയനാട്ടില്‍ വച്ച് പ്രഖ്യാപിക്കുമെന്നും വിവരമുണ്ട്. ആദ്യകാല കോണ്‍ഗ്രസുകാരനായ പി.എം ജോയി ബത്തേരി ബ്ലോക്ക് പഞ്ചായത്ത് പ്രസിഡണ്ട്, നെന്മേനി പഞ്ചായത്ത് മെമ്പര്‍ ജില്ലാ ഡിവിഷന്‍ അംഗം എന്നീ നിലകളില്‍ പ്രവര്‍ത്തിച്ചയാളാണ്. മുരളീധരന്‍ ഡി.ഐ.സി രൂപീകരിച്ചപ്പോള്‍ കോണ്‍ഗ്രസ്സ് വിട്ട പി.എം ജോയി പിന്നീട് ഇടത് ചേരിയോടൊപ്പം തന്നെയായിരുന്നു. പാര്‍ട്ടിയിലെ ഗ്രൂപ്പ് കളിയില്‍ മടുത്താണ് സംഘടന വിടുന്നത് എന്നാണ് പറയപ്പെടുന്നത്.
