ഏഴാമത് ദേശീയ ആയുര്‍വേദ ദിനത്തോടനുബന്ധിച്ച് വയനാട് ജില്ല ഭാരതീയ ചികിത്സാ വകുപ്പിന്റെയും,നാഷണല്‍ ആയുഷ് മിഷന്റെയും ആഭിമുഖ്യത്തില്‍ ജില്ലാ ആയുര്‍വേദ ആശുപത്രിയുടെ നേതൃത്വത്തില്‍ സംഘടിപ്പിക്കുന്ന വിവിധ പരിപാടികള്‍ക്ക് ഇന്ന് കല്‍പ്പറ്റ മുനിസിപ്പല്‍ ബസ് സ്റ്റാന്‍ഡില്‍ സംഘടിപ്പിച്ച യോഗ ഇന്‍ ട്യൂണ്‍,വിളംബര സന്ദേശം എന്നിവയിലൂടെ തുടക്കമായി.ജില്ലാ ആയുര്‍വേദ ആശുപത്രി ചീഫ് മെഡിക്കല്‍ ഓഫീസര്‍ ഡോ ഒ.വി സുഷ ദിനാചരണത്തിന്റെ ഉദ്ഘാടനം നിര്‍വ്വഹിച്ചു.’എല്ലാ ദിവസവും എല്ലാ വീട്ടിലും ആയുര്‍വേദം’ എന്നതാണ് ഈ വര്‍ഷത്തെ ആയുര്‍വേദ ദിന സന്ദേശം.ജില്ലാ ആയുര്‍വേദ ആശുപത്രിയില്‍ ആരോഗ്യ ബോധവല്‍ക്കരണം,മെഡിക്കല്‍ ക്യാമ്പ്,വിവിധ വകുപ്പുകളുടെ എക്സിബിഷന്‍, എസ്. പി. സി കുട്ടികള്‍ക്കായി ആയുര്‍വേദ ക്വിസ് മത്സരം, ഉപന്യാസ മത്സരം, ഹര്‍ ദിന്‍ ഹര്‍ ഘര്‍ ആയുര്‍വേദ ദീപാലങ്കാരം, ആയുര്‍വേദ പോഷകാഹാര പ്രദര്‍ശനം എന്നിവ പരിപാടിയുടെ ഭാഗമായി സംഘടിപ്പിക്കും.
