കാന്തന്‍പാറ വിനോദസഞ്ചാര കേന്ദ്രത്തിന്റെ വികസന പ്രവൃത്തികള്‍ ഇഴയുന്നു. ഡിടിപിസി ഏറ്റെടുത്ത ശേഷം ആരംഭിച്ച നവീകരണ പ്രവര്‍ത്തികള്‍ 3വര്‍ഷം കഴിഞ്ഞിട്ടും പൂര്‍ത്തീകരിക്കാനായില്ല. കൂടാതെ വിനോദ സഞ്ചാരികളിലും വന്‍കുറവാണ് വന്നിട്ടുള്ളത്. വനം വകുപ്പിന്റെ കൈയ്യില്‍ നിന്നും ഡി.ടി.പി.സി 4 വര്‍ഷം പിന്നിട്ടിട്ടും അടിസ്ഥാന സൗകര്യ വികസനം കാന്തന്‍ പാറയില്‍ ഇതുവരെ പൂര്‍ത്തിയായില്ല. ഡി.ടി.പി.സി അനുവദിച്ച 50 ലക്ഷം രൂപ ഫണ്ട് ഉപയോഗിച്ച് നവീകരണ പ്രവര്‍ത്തി ആരംഭിച്ചിട്ട് 3 വര്‍ഷം കഴിഞ്ഞു. ഗ്രീന്‍ കാര്‍പ്പറ്റ് പദ്ധതിയിലുള്‍പ്പെടുത്തി സംസ്ഥാന ടൂറിസം വകുപ്പ് ഒരു കോടി രൂപയും അനുവദിച്ചിട്ടുണ്ട്. അതുപയോഗിച്ച് പ്രധാനമായും ഇവിടേയ്ക്കുള്ള റോഡിന്റെ പ്രവര്‍ത്തി ആരംഭിച്ചെങ്കിലും അതും പാതി വഴിയിലാണ്. ഡി.ടി.പി.സി ഏറ്റെടുത്തിട്ടും കാര്യമായ പുരോഗതിയൊന്നും ഉണ്ടായിട്ടില്ലെന്നാണ് സ്ഥിതി. ഒക്ടോബര്‍ ഒന്നിന് വീണ്ടും തുറന്ന ശേഷം 300 ല്‍ താഴെ സഞ്ചാരികളെ കാന്തന്‍പാറയിലെത്തിയിട്ടുള്ളു. 2 കി.മീ റോഡ് പൊളിച്ചിട്ടിരിക്കുകയാണ്. റോഡ് റീ ടാറിങ്ങ് പൂര്‍ത്തീകരിക്കുകയും ചെയ്താല്‍ മാത്രമെ ഇവിടേയ്ക്ക് കൂടുതല്‍ സഞ്ചാരികളെത്തുകയുള്ളു. അതിനുള്ള അടിയന്തിര നടപടികള്‍ വേണമെന്നാണ് അവശ്യമുയരുന്നത്.
