വെള്ളമുണ്ട പോലീസ് സ്റ്റേഷന്‍ പരിധിയില്‍ വീണ്ടും മോഷണം. മാനന്തവാടി താലൂക്ക് ഓഫീസ് ജീവനക്കാരനായ പീച്ചങ്കോട് തയ്യത്ത് രാജേഷ് കുമാറിന്റെ വീട്ടിലാണ് ഇന്നലെ രാത്രിയില്‍ മോഷണം നടന്നത്. അടുക്കള വാതിലിന്റെ കുറ്റിയിളക്കി അകത്തു കടന്ന മോഷ്ടാവ് ബെഡ്‌റൂമിലെ അലമാരയില്‍ സൂക്ഷിച്ച 23 പവനോളം സ്വര്‍ണ്ണാഭരണം മോഷ്ടിച്ചു. രാജേഷും കുടുംബവും പുറത്ത് പോയ സമയത്ത് അടുക്കള ഭാഗത്തെ വാതില്‍ കുറ്റി തകര്‍ത്താണ് മോഷ്ടാവ് അകത്ത് കടന്നത്. വിരലടയാള വിദഗ്ദരും ഡോഗ് സ്‌ക്വാഡും സ്ഥലത്തെത്തി പരിശോധന നടത്തി. വെള്ളമുണ്ട പോലീസ് സബ് ഇന്‍സ്‌പെക്ടര്‍ പി ജിതേഷിന്റെ നേതൃത്വത്തില്‍ കേസെടുത്ത് അന്വേഷണം ആരംഭിച്ചു.
