പുനര്ജ്ജനി മിനി ക്യാമ്പ് ആരംഭിച്ചു
മാനന്തവാടി : ‘യുവത്വം ആസ്തികളുടെ പുനര് നിര്മ്മാണത്തിന്’ എന്ന ആശയവുമായി നാഷണല് സര്വീസ് സ്കീം ടെക്നിക്കല് സെല് സംസ്ഥാനത്തുടനീളം നടത്തിവരുന്ന പുനര്ജ്ജനി മിനി ക്യാമ്പിന് മാനന്തവാടിയിലെ ജില്ലാ ആശുപത്രിയില് തുടക്കമായി. വയനാട് ഗവണ്മെന്റ് എഞ്ചിനീയറിംഗ് കോളേജിലെ നാഷണല് സര്വീസ് സ്കീം യൂണിറ്റുകളുടെ നേതൃത്വത്തില് ആരംഭിച്ച ക്യാമ്പ് സബ് കലക്ടര് എന്.എസ്.കെ ഉമേഷ് ഐ.എ.എസ് ഉദ്ഘാടനം ചെയ്തു.ആശുപത്രി സൂപ്രണ്ട് ഡോ.ജിതേഷ് അധ്യക്ഷത വഹിച്ചു.
ആശുപത്രികളില് ഉപയോഗശൂന്യമായി കിടക്കുന്ന ബയോമെഡിക്കല് ഉപകരണങ്ങള്, ഫര്ണ്ണീച്ചറുകള്, വീല്ചെയറുകള്, ട്രോളികള് തുടങ്ങിയവയുടെ പുനരുദ്ധാരണമാണ് ക്യാമ്പിന്റെ ലക്ഷ്യം. മാനന്തവാടി ജില്ലാ ആശുപത്രിയിലും പേര്യ സാമൂഹികാരോഗ്യ കേന്ദ്രത്തിലുമായിട്ടാണ് അഞ്ച് ദിവസം നീളുന്ന ക്യാമ്പ് നടക്കുന്നത്. മുന് വര്ഷങ്ങളിലെ ക്യാമ്പുകളിലൂടെ ഒരു കോടിയോളം രൂപയുടെ ഉപകരണങ്ങള് നന്നാക്കാന് കഴിഞ്ഞതായി ക്യാമ്പ് ഡയറക്ടര് അലി.കെ.പി പറഞ്ഞു. ആര്.എം.ഒ ഡോ.അബ്ദുല് റഹീം കപൂര്, നഴ്സിംഗ് സൂപ്രണ്ട് എന്.ഓമന , പ്രോഗ്രാം ഓഫീസര് അലി.കെ.പി, വളണ്ടിയര് കോര്ഡിനേറ്റര്മാരായ വിജീഷ് വിന്സന്റ്, കെല്വിന് സുനില് എന്നിവര് പ്രസംഗിച്ചു.