വടക്കനാട്: മേയാന്‍ വിട്ട പശുവിനെ കടുവ ആക്രമിച്ച് കൊന്ന് പാതി ഭക്ഷിച്ചു. പണയമ്പം ആനക്കല്ലിങ്കല്‍ ഗോപിയുടെ പൂര്‍ണ ഗര്‍ഭിണിയായ പശുവിനെയാണ് കടുവ കൊന്നു പാതിതിന്നത്. തിങ്കളാഴ്ച ഉച്ചയ്ക്ക് ശേഷം ചെമ്പരത്തിമൂലയില്‍ വച്ചാണ് കടുവ പശുവിനെ ആക്രമിച്ചത്. വനാതിര്‍ത്തിയില്‍ പശുക്കളെ തീറ്റിയ ശേഷം വീട്ടിലേക്ക് മടങ്ങുന്നതിനിടെയാണ് സംഭവം. മുന്നിലുണ്ടായിരുന്ന പശുക്കിടാവിനെ ആട്ടിതെളിച്ച ശേഷം, ഗോപി തിരിച്ചു ചെന്നപ്പോള്‍ പശുവിനെ കാണാനില്ലായിരുന്നു. തുടര്‍ന്ന് രാത്രിവരെ പരിസരത്ത് തിരച്ചില്‍ നടത്തിയെങ്കിലും കണ്ടെത്താനായില്ല. തുടര്‍ന്ന് ചൊവ്വാഴ്ച രാവിലെ കുടുംബാംഗങ്ങളും നാട്ടുകാരും ചേര്‍ന്ന് നടത്തിയ തിരച്ചിലിലാണ് വനത്തിനുള്ളില്‍ നിന്നും പശുവിന്റെ ജഡം കണ്ടെത്തി. വിവരമറിയിച്ചതിന്റെ അടിസ്ഥാനത്തില്‍ സ്ഥലത്തെത്തിയ വനംവകുപ്പ് ഉദ്യോഗസ്ഥര്‍ തുടര്‍നടപടികള്‍ സ്വീകരിച്ചു. ഒരാഴ്ച മുമ്പ് പ്രദേശവാസിയായ പണയമ്പത്ത് രാജന്റെ പശുവിനെയും കടുവ കൊന്നിരുന്നു. തുടര്‍ച്ചയായി വളര്‍ത്തു മൃഗങ്ങളെ കടുവ കൊന്നുതിന്നാന്‍ തുടങ്ങിയതോടെ പ്രദേശവാസികള്‍ ഭീതിയിലായിരിക്കുകയാണ്.
