കുറിച്യാര്‍മല പീവീസ് ഗ്രൂപ്പ് എസ്റ്റേറ്റില്‍ ആനുകൂല്യങ്ങള്‍ ആവശ്യപ്പെട്ട്് തൊഴിലാളികള്‍ നടത്തുന്ന കുടില്‍കെട്ടി സമരം 20-ാം ദിവസത്തിലേക്ക്.തൊഴിലാളികള്‍ തോട്ടം കൈയ്യേറിയെന്ന് ആരോപിച്ച് എസ്റ്റേറ്റ് മാനേജ്‌മെന്റ് തൊഴിലാളികള്‍ക്കെതിരെ പോലീസില്‍ പരാതി നല്‍കി.കുറിച്യാര്‍മല എസ്റ്റേറ്റ് സമരം 20-ാം ദിവസത്തിലേക്ക് എത്തി നില്‍ക്കുമ്പോഴും ഒത്തു തീര്‍പ്പിനൊരുങ്ങാതെ തൊഴിലാളികള്‍ക്കെതിരെ പരാതിയുമായി മുന്നോട്ട് പോകുന്ന എസ്റ്റേറ്റ് മാനേജ്‌മെന്റിന്റെ നിലപാട് തൊഴിലാളികളെ കൂടുതല്‍ പ്രതിസന്ധിയിലേക്കാണ് നയിക്കുന്നത്.മൂന്നര മാസത്തോളമായി ശമ്പളവും മറ്റു ആനുകൂല്യങ്ങളും ഇല്ലാതെ കുടുംബങ്ങള്‍ പട്ടിണിയായ സാഹചര്യത്തിലും തൊഴിലാളികള്‍ക്കനുകൂലമായൊരു നിലപാടെടുക്കാതെ അവര്‍ക്കെതിരെ പോലീസില്‍ പരാതി നല്‍കിയത് തൊഴിലാളികളെ കൂടുതല്‍ പ്രതിസന്ധിയിലാക്കി. നിലവില്‍ കോടതിയില്‍ നിന്നും സംയുക്ത ട്രേഡ് യൂണിയന്‍ അംഗങ്ങള്‍ ഉള്‍പ്പെടുന്ന 13 പേര്‍ക്കാണ് കോടതിയില്‍ നിന്ന് നോട്ടീസ് വന്നിരിക്കുന്നത്. തങ്ങള്‍ക്കു നീതി ലഭിക്കുന്നത് വരെ ശക്തമായി പ്രതിഷേധിക്കുവാനും കേസിനെ നേരിടാനും ആണ് ഉദ്ദേശിച്ചിരിക്കുന്നതെന്ന് സംയുക്ത ട്രേഡ് യൂണിയന്‍ പറഞ്ഞു.
