പെരിക്കല്ലൂര്‍ തോണിക്കടവില്‍ നിന്ന് നാല് ലിറ്റര്‍ വാറ്റ് ചാരായം ജില്ലാ ആന്റി നര്‍ക്കോട്ടിക് സ്‌ക്വാഡ് പിടികൂടി. നര്‍ക്കോട്ടിക് ഡി.വൈ.എസ്.പി. വി. റെജികുമാറിന് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് പ്രതികളെ പിടികൂടിയത്. ഇന്ന് ഉച്ചയോടെ പെരിക്കല്ലൂര്‍ തോണിക്കടവിനോട് ചേര്‍ന്നുള്ള സ്വകാര്യ റിസോര്‍ട്ടിന് സമീപത്ത് വെച്ചാണ് വാറ്റ് ചാരായവുമായി പ്രതികളെ അറസ്റ്റ് ചെയ്തത്. പാരിപ്പള്ളിയില്‍ പി.യു. ബേബി (54) , മേനാശ്ശേരി എം.ടി. ജോണി (54) എന്നിവരെയാണ് അറസ്റ്റ് ചെയ്തത്. ഇവര്‍ക്കെതിരെ അബ്കാരി ആക്ട് പ്രകാരം കേസെടുത്തു. പ്രദേശത്ത് വ്യാജ മദ്യ വില്പനയും വാറ്റും സജീവമാണെന്ന് പരാതിയുയര്‍ന്നിരുന്നു ഇതേ തുടര്‍ന്ന് എക്‌സൈസും പോലീസും ഈ പ്രദേശങ്ങളില്‍ പരിശോധന കര്‍ശനമാക്കിയിരുന്നു. കഴിഞ്ഞയാഴ്ച ഇതേ സ്ഥലത്ത് വെച്ച് പോലീസ് അര ലക്ഷത്തോളം രൂപ വിലവരുന്ന നിരോധിത പാന്‍മസാലയുമായി ബത്തേരി സ്വദേശിയെ അറസ്റ്റ് ചെയ്തിരുന്നു.
