ബത്തേരി സെന്റ്മേരീസ് കോളേജില്‍ സംഘടിപ്പിച്ച കോഴിക്കോട് ഇന്റര്‍സോണ്‍ കലോത്സവത്തില്‍ ഫാറൂഖ് കോളേജിന്റെ ആധിപത്യം തകര്‍ത്ത് പാലക്കാട് ഗവ.വിക്ടോറിയ കോളേജിന് കിരീടം. 154 പോയിന്റ് നേടിയാണ് വിക്ടോറിയ കോളേജ് കലാകിരീടം ചൂടിയത്. നീണ്ട ഇടവേളക്കുശേഷമാണ് വിക്ടോറിയ കോളേജ് ഇന്റര്‍സോണ്‍ കലോത്സവത്തില്‍ വിജയികളാകുന്നത്. 149 പേരാണ് ഇന്റര്‍സോണ്‍ കലോത്സവത്തില്‍ പങ്കെടുക്കുന്നതിനായി ബത്തേരിയിലെത്തിയത്. രണ്ടാം സ്ഥാനം നേടിയ കോഴിക്കോട് സെന്റ്ജോസഫ് ദേവഗിരി കോളേജിന് 133 പോയിന്റും ലഭിച്ചു. ഹാട്രിക് വിജയവുമായെത്തി കോഴിക്കോട് ഫാറൂഖ് കോളേജിന് 118 പോയന്റ് നേടി മൂന്നാം സ്ഥാനം കൊണ്ട് തൃപ്തിപെടേണ്ടിവന്നു. 105 പോയിന്റു നേടിയ തൃശൂര്‍ സെന്റ് തോമസ് കോളേജാണ് നാലാം സ്ഥാനത്ത്. ആതിഥേയരായ ബത്തേരി സെന്റ്മേരീസ് കോളേജിന് 53 പോയിന്റും ലഭിച്ചു.
