മാനന്തവാടി: കല്ലോടി സെന്റ് ജോസഫ്‌സ് ഹയര്‍ സെക്കണ്ടറി സ്‌കൂളില്‍ നിന്ന് 1989ല്‍ പൂര്‍ത്തിയാക്കിയ 200 ഓളം വിദ്യാര്‍ത്ഥികള്‍ 13 ന് വീണ്ടും വിദ്യാലയത്തില്‍ ഒത്ത് ചേരും. ‘കൂട്ട് 89’ എന്ന് നാമകരണം ചെയ്ത പൂര്‍വ വിദ്യാര്‍ത്ഥി സംഗമം 13 ന് നടക്കും. സംഗമത്തില്‍ വെച്ച് 1 മുതല്‍ 10 വരെ ക്ലാസുകളില്‍ പഠിപ്പിച്ച മുഴുവന്‍ അധ്യാപകരെയും ആദരിക്കുമെന്നും സംഘാടകര്‍ വാര്‍ത്താ സമ്മേളനത്തില്‍ അറിയിച്ചു.
കഴിഞ്ഞ ഒരു വര്‍ഷം കൊണ്ടാണ് 89 ബാച്ചിലെ മുഴുവന്‍ വിദ്യാര്‍ഥികളെയും കണ്ടെത്താനായത്. സംഗമത്തില്‍ മുഴുവന്‍ പൂര്‍വ വിദ്യാര്‍ത്ഥികളും 40 അധ്യാപകരും പങ്കെടുക്കും. 13ന് രാവിലെ 9ന് കല്ലോടി സെന്റ് ജോസഫ്‌സ് ഹയര്‍ സെക്കണ്ടറി സ്‌കൂള്‍ പ്രധാനധ്യാപിക അന്നമ്മ മേഴ്‌സി ആന്റണി ഉദ്ഘാടനം നിര്‍വ്വഹിക്കും. സ്‌നേഹ വിരുന്നിനും കലാപരിപാടികള്‍ക്കും ശേഷം ഗുരുവന്ദനം നടക്കും. മുഴുവന്‍ അധ്യാപകരെയും ഉപഹാരം നല്‍കി ആദരിക്കും. പരിപാടിയുടെ ഒരുക്കങ്ങള്‍ പൂര്‍ത്തിയായതായി ജോജി യവനാര്‍കുളം, ഷോജി ജോസഫ്, ഷാജി ചീങ്കല്ലേല്‍, ശാരദാ സജീവന്‍, ജോളി എന്നിവര്‍ അറിയിച്ചു.
