ഗ്രാമപ്പഞ്ചായത്തിന്റെ നേതൃത്വത്തില്‍ പുല്‍പ്പള്ളിയില്‍ ജല ഗുണനിലവാര പരിശോധനാ ലാബ് ഈ മാസം 4ന് പ്രവര്‍ത്തനമാരംഭിക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. പഞ്ചായത്ത് ബള്‍ക്ക് വാട്ടര്‍ സപ്ലൈ സ്‌കീം ഓഫീസിനോട് ചേര്‍ന്നാണ് ലാബൊരുക്കിയിരിക്കുന്നത്. ഗ്രാമപ്പഞ്ചായത്ത് 12 ലക്ഷത്തോളം രൂപ ചെലവഴിച്ചാണ് അത്യാധുനിക സൗകര്യങ്ങളൊടെയുള്ള ലാബ് ആരംഭിക്കുന്നത്. പുല്‍പ്പള്ളി, മുള്ളന്‍കൊല്ലി, പൂതാടി പഞ്ചായത്തുകളില്‍നിന്നുള്ള ജനങ്ങള്‍ക്ക് ജല ഗുണനിലവാരം ഉറപ്പുവരുത്തുന്നതിനും ഏറ്റവും എളുപ്പത്തിലും മിതമായ നിരക്കിലും ജല പരിശോധന നടത്തുന്നതിനുള്ള ക്രമീകരണങ്ങളാണ് ഒരുക്കിയിരിക്കുന്നത്. ലാബിന്റെ ഉദ്ഘാടനം തിങ്കളാഴ്ച ഉച്ചയ്ക്ക് 12ന് ഐ.സി. ബാലകൃഷ്ണന്‍ എം.എല്‍.എ. നിര്‍വഹിക്കുമെന്ന് ഭാരവാഹികളായ ഗ്രാമപ്പഞ്ചായത്ത് പ്രസിഡന്റ് ടി.എസ്. ദിലീപ് കുമാര്‍, എം. രാമകൃഷ്ണന്‍, ഷീബ മോഹന്‍, അനീഷ് കെ.തോമസ്, കെ.എം. മാത്യു തുടങ്ങിയവര്‍ വാര്‍ത്തസമ്മേളനത്തില്‍ പറഞ്ഞു.
