കേരള ഹോട്ടല്‍ ആന്‍ഡ് റസ്റ്റോറന്റ് അസോസിയേഷന്‍ വയനാട് ജില്ലാ സമ്മേളനം നവംബര്‍ 21 ന് കല്‍പ്പറ്റ ഹോളിഡേയ്‌സ് റസ്റ്റോറന്റ് ഓഡിറ്റോറിയത്തില്‍ നടക്കുമെന്ന് ഭാരവാഹികള്‍ കല്‍പ്പറ്റയില്‍ വാര്‍ത്താ സമ്മേളനത്തില്‍ അറിയിച്ചു. രാവിലെ 10 മണിക്ക് പതാക ഉയര്‍ത്തുന്നതോടെ പരിപാടിക്ക് തുടക്കം കുറിക്കും. സംസ്ഥാന പ്രസിഡണ്ട് ജി ജയപാല്‍ ഉദ്ഘാടനം ചെയ്യുന്ന പരിപാടിയില്‍ ഭക്ഷ്യ ഉല്‍പാദന മേഖലയിലെ സമ്പൂര്‍ണ്ണ സുരക്ഷിതത്വം എന്ന വിഷയത്തില്‍ സെമിനാര്‍ നടക്കും. ജില്ലയിലെ മുഴുവന്‍ യൂണിറ്റ് പ്രസിഡണ്ട്, സെക്രട്ടറി എന്നിവര്‍ക്ക് പുറമേ ജില്ലാ പ്രതിനിധികളും സമ്മേളനത്തിന്റെ ഭാഗമാകും. ഭക്ഷ്യ ഉല്‍പാദന വിപണന മേഖലയില്‍ നേരിടുന്ന പ്രശ്‌നങ്ങളെ കുറിച്ച് സമ്മേളനം ചര്‍ച്ച ചെയ്യും. സംസ്ഥാന സെക്രട്ടറി അനീഷ് ബി നായര്‍, സംസ്ഥാന സമിതി അംഗം അസ്ലം ബാവ, ജില്ലാ പ്രസിഡണ്ട് ബിജു മന്ന, ജില്ലാ സെക്രട്ടറി യു സുബൈര്‍, ജില്ലാ ട്രഷറര്‍ അബ്ദുറഹ്‌മാന്‍ പ്രാണിയത്ത്, ജില്ലാ വര്‍ക്കിംഗ് പ്രസിഡണ്ട് മുജീബ് ചുണ്ട, ജില്ലാകമ്മിറ്റി അംഗം റെജി വൈത്തിരി, റഷീദ് ബാംബൂ എന്നിവര്‍ വാര്‍ത്തസമ്മേളനത്തില്‍ പങ്കെടുത്തു.
