പൂഴിത്തോട് പടിഞ്ഞാറത്തറ ജനകീയ കര്‍മ്മ സമിതി നേതൃത്വത്തില്‍ പ്രതിഷേധ സായാഹ്ന ജാഥ സംഘടിപ്പിച്ചു. പൂഴിത്തോട് -പടിഞ്ഞാറത്തറ ചുരമില്ല പാതയ്ക്ക് തുരങ്കംവെക്കുന്ന ടൈഗര്‍ സഫാരി പാര്‍ക്ക് പദ്ധതി ഉപേക്ഷിക്കുക, ചുരമില്ല പാത യാഥാര്‍ത്ഥ്യമാക്കുക എന്ന ആവശ്യം ഉയര്‍ത്തിയാണ് പ്രതിഷേധ ജാഥാ സംഘടിപ്പിച്ചത്. പൂഴിത്തോട് റോഡിനായി തറക്കല്ലിട്ട് മുപ്പതാം ആണ്ട് തികയുമ്പോഴാണ് പാതയുടെ ഭാഗമായ ചക്കിട്ടപ്പാറ പഞ്ചായത്തിലെ ചെമ്പനോടയില്‍ ടൈഗര്‍ സഫാരി പാര്‍ക്ക് ആരംഭിക്കാന്‍ നീക്കം അണിയറയില്‍ നടക്കുന്നത്. ഈ നീക്കം ചുരമില്ല പാത അട്ടിമറിക്കാന്‍ ആണെന്നാണ് ആരോപണം. ജനകീയ കര്‍മ്മ സമിതി ചെയര്‍മാന്‍ ശകുന്തള, വൈസ് ചെയര്‍മാന്‍ ഒ.ജെ ജോണ്‍സണ്‍, കണ്‍വീനര്‍ കമല്‍ ജോസഫ്, എ കെ അന്ത്രു ഹാജി, ജോണി നന്നാട്ട്, ഹാരിസ് കെ, എന്നിവര്‍ സംസാരിച്ചു.
