എം.ഡി.എം.എ കടത്തിയയാളില്‍ നിന്ന് കൈക്കൂലി വാങ്ങിയ അഞ്ച് എക്‌സൈസ് ഉദ്യോഗസ്ഥര്‍ക്ക് സസ്‌പെന്‍ഷന്‍
മുത്തങ്ങ എക്‌സൈസ് ചെക്‌പോസ്റ്റ് വഴി എം.ഡി.എം.എ കടത്തിക്കൊണ്ടുവന്ന് പിടിയിലായ ആളില്‍ നിന്ന് അരലക്ഷം രൂപ കൈക്കൂലി വാങ്ങിയെന്ന കേസിലാണ് എക്‌സൈസ് ഇന്‍സ്‌പെക്ടര്‍ ഉള്‍പ്പെടെ അഞ്ചുപേരെ എക്‌സൈസ് കമ്മീഷണര്‍ സസ്‌പെന്‍ഡ് ചെയ്ത് ഉത്തരവിറക്കിയത്. 2023 മാര്‍ച്ച് 21നായിരുന്നു കേസില്‍ ആസ്പദമായ സംഭവം. എംഡി.എം.എയും കഞ്ചാവുമായി കാറില്‍ എത്തിയ ഫാസിര്‍ എന്നയാളെ വാഹന പരിശോധനയ്ക്കിടെ പിടികൂടുകയും പിന്നീട് ഇയാളില്‍ നിന്ന് 50000 രൂപ കൈക്കൂലി വാങ്ങിയശേഷം ജാമ്യത്തില്‍ വിട്ടയക്കുകയും ചെയ്‌തെന്നാണ് കേസ്. എക്‌സൈസ് കമ്മീഷണറുടെ നിര്‍ദ്ദേശപ്രകാരം എക്‌സൈസ് വിജിലന്‍സ് ഓഫീസര്‍ നടത്തിയ അന്വേഷണത്തിലാണ് ഉദ്യോഗസ്ഥരുടെ പങ്ക് വെളിവായത്. എക്‌സൈസ് ഇന്‍സ്‌പെക്ടര്‍ ടി എച്ച് ഷഫീഖ്, പി കെ പ്രഭാകരന്‍, ടി ബി അജീഷ്, കെ കെ സുബീഷ്, എം കെ ബാലകൃഷ്ണന്‍ എന്നിവരെയാണ് സസ്‌പെന്‍ഡ് ചെയ്തത്. ഇതില്‍ പ്രഭാകരന്‍, സുധീഷ് എന്നിവര്‍ നേരത്തെ തന്നെ കേസില്‍ ഉള്‍പ്പെട്ട് സസ്‌പെന്‍ഷനിലാണ്.
