സംസ്ഥാന വിനോദസഞ്ചാര വകുപ്പിന്റെയും ജില്ലാ ടൂറിസം പ്രൊമോഷന്‍ കൗണ്‍സിലിന്റെയും ആഭിമുഖ്യത്തില്‍ ജില്ലയില്‍ നടത്തിയ ഓണം വാരാഘോഷത്തിന് കൊടിയിറങ്ങി. ജില്ലാ ഭരണകൂടത്തിന്റെയും ത്രിതല പഞ്ചായത്തുകളുടെയും സഹകരണത്തോടെ ജില്ലയില്‍ വിവിധ കേന്ദ്രങ്ങളിലായി സംഘടിപ്പിച്ച ഓണം വാരാഘോഷത്തിനാണ് കല്‍പ്പറ്റയില്‍ സമാപനമായത്. കല്‍പ്പറ്റ ചന്ദ്രഗിരി ഓഡിറ്റോറിയത്തില്‍ നടന്ന ഓണം വാരാഘോഷത്തിന്റെ സമാപന സമ്മേളനം ടി. സിദ്ദീഖ് എം.എല്‍.എ ഉദ്ഘാടനം ചെയ്തു. കല്‍പ്പറ്റ നഗരസഭാ വാര്‍ഡ് കൗണ്‍സിലര്‍ രാജാ റാണി അധ്യക്ഷനായിരുന്നു. ഡി.ടി.പി.സി എക്‌സിക്യൂട്ടീവ് മെമ്പര്‍ പി.കെ അനില്‍കുമാര്‍, ഡി.ടി.പി.സി സീനിയര്‍ മാനേജര്‍ സി.ആര്‍ ഹരിഹരന്‍, ഡി.ടി.പി.സി മാനേജര്‍ രതീഷ് ബാബു തുടങ്ങിയവര്‍ സംസാരിച്ചു.
കല്‍പ്പ എസ്.കെ.എം.ജെ ഗ്രൗണ്ടില്‍ നടന്ന വടംവലി മത്സരം ആവേശത്തോടെയാണ് കാണികള്‍ ഏറ്റെടുത്തത്. വടംവലി മത്സരത്തില്‍ ബ്രദേഴ്‌സ് ഗൂഡലായി ഒന്നാം സ്ഥാനവും സെവന്‍സ്റ്റാര്‍ എമിലി രണ്ടാം സ്ഥാനവും, നവധാര ഗൂഡലായിക്കുന്ന് മൂന്നാം സ്ഥാനവും നേടി.
ആഘോഷ പരിപാടികളുടെ സമാപന ദിനത്തില്‍ സുല്‍ത്താന്‍ ബത്തേരി രംഗരചന സംഗീത നാടക അക്കാദമിയുടെ നേതൃത്വത്തില്‍ നടന്ന മോഹിനിയാട്ടം, ഭരതനാട്യം എന്നിവയോടെയാണ് കലാപരിപാടികള്‍ക്ക് തുടക്കമായത്. തുടര്‍ന്ന് ഐഡിയ സ്റ്റാര്‍ സിംഗര്‍ ഫെയിം അനുശ്രീ അനില്‍കുമാര്‍, അമല്‍ സി. അജിത് എന്നിവരുടെ നേതൃത്വത്തില്‍ നടന്ന മ്യൂസിക്കല്‍ നൈറ്റ് സംഗീത ആസ്വാദകര്‍ക്ക് ഏറെ ഹൃദ്യമായി. ഓണം വാരാഘോഷത്തിന്റെ ഭാഗമായി വൈവിധ്യമാര്‍ന്ന കലാ പരിപാടികകളും കായിക മത്സരങ്ങളുമാണ് നടന്നത്. ഡെസ്റ്റിനേഷന്‍ മാനേജ്മെന്റ് കൗണ്‍സിലുകള്‍, ടൂറിസം ക്ലബ്ബുകള്‍, ടൂറിസം ഓര്‍ഗനൈസേഷനുകള്‍, കുടുംബശ്രീ, സന്നദ്ധ സംഘടനകള്‍ എന്നിവരുടെ സഹകരണത്തോടെയാണ് ഓണം വാരാഘോഷം സംഘടിപ്പിച്ചത്. ആഘോഷങ്ങളുടെ ഭാഗമായി എല്ലാ ദിവസവും വൈകീട്ട് വൈവിധ്യമാര്‍ന്ന കലാപരിപാടികളും നടത്തിയിരുന്നു.
