കല്‍പ്പറ്റ: ഗജ ചുഴലിക്കാറ്റില്‍ ദുരിതത്തിലായവര്‍ക്ക് ജില്ലാ ഭരണകൂടത്തിന്റെ രണ്ടാംഘട്ട സഹായം തഞ്ചാവൂര്‍ ജില്ലയിലെ പട്ടുക്കോട്ടയിലേക്ക് അയച്ചു. അരി, പച്ചക്കറികള്‍, വസ്ത്രങ്ങള്‍, വെള്ളം, മോട്ടര്‍, ശുചീകരണ വസ്തുക്കള്‍ തുടങ്ങിയ അവശ്യവസ്തുക്കളടങ്ങിയ ഒരു ലോഡ് സാധനങ്ങളാണ് അയച്ചത്. സബ് കളക്ടര്‍ എന്‍.എസ്.കെ ഉമേഷ് കളക്ട്രേറ്റില്‍നിന്നു പുറപ്പെട്ട വാഹനം ഫ്‌ളാഗ് ഓഫ് ചെയ്തു. ജില്ലാ ഭരണകൂടം നേരിട്ട് സംഭരിച്ച സാധനങ്ങള്‍ അയക്കാന്‍ സര്‍ക്കാര്‍ വാഹനങ്ങള്‍ തന്നെയാണ് ഉപയോഗിക്കുന്നത്. എണ്ണം തിട്ടപെടുത്തി തരംതിരിച്ചാണ് ദുരിതബാധിതര്‍ക്ക് എത്തിക്കുന്നത്. വരും ദിവസങ്ങളിലും അവശ്യവസ്തുക്കള്‍ അയക്കാനാണ് ജില്ലാ ഭരണകൂടത്തിന്റെ തീരുമാനം. ഇതിനായി കളക്ട്രേറ്റില്‍ റിലീഫ് മെറ്റീരിയല്‍ കളക്ഷന്‍ സെന്റര്‍ ഒരുക്കിയിട്ടുണ്ട്.
