സര്‍ക്കാരിന്റെ ലക്ഷ്യം ഉന്നത നിലവാരമുള്ള സമഗ്ര വിദ്യാഭ്യാസമെന്ന് വൈദ്യുതി മന്ത്രി എം.എം മണി. ഇതര സംസ്ഥാനങ്ങളിലെ ഉന്നത വിദ്യാഭ്യാസ മികവിനോടൊപ്പം നില്‍ക്കാന്‍ നമ്മുടെ സ്‌കൂളുകളെ പ്രാപ്തരാക്കുക എന്നതാണ് ഉദ്ദേശിക്കുന്നതെന്നും മന്ത്രി പറഞ്ഞു. വടുവഞ്ചാല്‍ ഹയര്‍സെക്കന്ററി സ്‌കൂളില്‍ ഹൈ ടെക് ക്ലാസ് മുറികളുടെയും അടല്‍ ഡിംങ്കറിങ് ലാബിന്റെയും ഉദ്ഘാടനം നിര്‍വഹിച്ചു കൊണ്ട് സംസാരിക്കുകയായിരുന്നു അദ്ദേഹം. നവകേരള മിഷനില്‍ ഉള്‍പ്പെടുത്തി പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായാണ് 21 ക്ലാസ് മുറികള്‍ ഹൈടെക് ആക്കിയത്. ചടങ്ങില്‍ ബത്തേരി എം.എല്‍.എ ഐ.സി ബാലകൃഷ്ണന്‍ അദ്ധ്യക്ഷനായിരുന്നു. ബ്ലോക്ക് പഞ്ചായത്ത് പ്രസിഡന്റ് ലതാ ശശി, അമ്പലവല്‍ പഞ്ചായത്ത് പ്രസിഡന്റ് സീത വിജയന്‍, എച്ച്.എം മിനി ഷാഹിദ, ഹരിദാസ് തുടങ്ങിയവര്‍ സംസാരിച്ചു.
