കേരള-കര്‍ണാടക അതിര്‍ത്തിയിലെ പെരിക്കല്ലൂര്‍ ,മരക്കടവ് എന്നിവിടങ്ങളിലെ നൂറോളം തൊഴിലാളികളാണ് മാസങ്ങളായി പണിയില്ലാതെ ദുരിതത്തിലായത്. പുല്‍പ്പള്ളി, മുള്ളന്‍കൊല്ലി, പൂതാടി പഞ്ചായത്തുകളിലുള്ളവര്‍് എളുപ്പത്തില്‍ കര്‍ണാടകയുമായി ബന്ധപ്പെട്ടിരുന്നത് പെരിക്കല്ലൂരിലെയും മരക്കടവിലെയും തോണിക്കടവുകളിലൂടെയായിരുന്നു. പുല്‍പ്പള്ളിയില്‍ നിന്ന് മൈസൂരുവിലേക്ക് ഇതു വഴി നൂറുകിലോമീറ്ററോളം ദൂരമേയുള്ളൂ. കഴിഞ്ഞ നാലു മാസത്തിലേറെയായി അന്തര്‍ സംസ്ഥാന യാത്രക്ക് നിരോധനം ഏര്‍പ്പെടുത്തിയതോടെയാണ് തോണിക്കാരും പ്രതിസന്ധിയിലായത്.
തോണി കടത്തുമായി ബന്ധപ്പെട്ട് ഉപജീവന മാര്‍ഗം നടത്തുന്ന കുടുംബങ്ങള്‍ മറ്റു തൊഴില്‍ മേഖലകള്‍ തേടിപ്പോവുകയാണിപ്പോള്‍. ഈ രംഗത്ത് മാത്രം ശ്രദ്ധ കേന്ദ്രീകരിച്ചിരിക്കുന്ന തൊഴിലാളികള്‍ക്ക് മറ്റു തൊഴിലുകള്‍ അറിയുകയുമില്ല. ഇവരെ സഹായിക്കാന്‍ സര്‍ക്കാര്‍ തയാറാകണമെന്നാണ് ആവശ്യം ഉയര്‍ന്നിരിക്കുന്നത്.
