മേപ്പാടിയില്‍ ഡിഎം എഡ്യുക്കേഷന്‍ ആന്‍ഡ് റിസര്‍ച്ച് ഫൗണ്ടേഷന്റെ ഉടമസ്ഥതയിലുള്ള സ്വാശ്രയ സ്ഥാപനമാണ് ഡിഎം വിംസ് മെഡിക്കല്‍ കോളേജ്. ഈ മെഡിക്കല്‍ കോളേജും അനുബന്ധ സ്ഥാപനങ്ങളും സംസ്ഥാന സര്‍ക്കാറിന് കൈമാറാനുള്ള സന്നദ്ധതയാണ് മാനേജിംഗ് ട്രസ്റ്റി ഡോക്ടര്‍ ആസാദ് മൂപ്പന്‍ അറിയിച്ചിരിക്കുന്നത്. ഈ നിര്‍ദ്ദേശത്തെ കുറിച്ചു പഠിക്കാന്‍ മെഡിക്കല്‍ കോളേജിലെ പ്രൊഫസര്‍മാര്‍ ഉള്‍പ്പെട്ട വിദഗ്ദ സംഘത്തെ നിയോഗിച്ചു കൊണ്ട് സംസ്ഥാന സര്‍ക്കാര്‍ ഉത്തരവായി. മൂന്നാഴ്ചയ്ക്കകം സമിതി സര്‍ക്കാറിന് റിപ്പോര്‍ട്ട് നല്‍കും.വയനാട്ടില്‍ സര്‍ക്കാര്‍ മേഖലയില്‍ മെഡിക്കല്‍ കോളേജ് തുടങ്ങാനുള്ള ശ്രമം ഇതു വരെ എങ്ങുമെത്താത്ത സാഹചര്യത്തില്‍ കൂടിയാണ് സര്‍ക്കാര്‍ സ്വകാര്യ മെഡിക്കല്‍ കോളേജ് ഏറ്റെടുക്കുന്ന കാര്യ പരിഗണിക്കുന്നത് എന്നാണ് സൂചന.
