മാനന്തവാടി നഗരസഭ പരിധിയിലെ നാല്,രണ്ട് ഡിവിഷനുകളില്‍പ്പെട്ട ജെസ്സി കോമ്പി പാലത്തിന് സമീപത്തെ വയല്‍ അനധികൃതമായി മണ്ണിട്ട് നികത്തുന്നതായാണ് പരാതി ഉയരുന്നത്.ഏരുമത്തെരുവ് -ജെസ്സി റോഡ് നിര്‍മ്മാണത്തിന്റെ ഭാഗമായി നീക്കം ചെയ്ത മണ്ണാണ് ഇവിടെ നിക്ഷേപിച്ചത്.ഇതിന് സമീപത്തായി നീര്‍ച്ചാലുകളുമുണ്ട്.കാലവര്‍ഷത്തില്‍ മണ്ണ് ഒലിച്ച് ഇറങ്ങി കൃഷി ഭൂമി പാടെ ഇല്ലാതായി മാറുമെന്നും കൃഷിക്കും,ഗാര്‍ഹിക ആവശ്യങ്ങള്‍ക്കും ഉപയോഗിക്കുന്ന തോടും നശിക്കുമെന്ന് പ്രദേശവാസികള്‍ പറയുന്നു.സമീപത്തെ 12 ഓളം കുടുംബങ്ങള്‍ സബ്ബ് കളക്ടര്‍ക്ക് പരാതി നല്‍കുമെന്നും ഇവര്‍ പറഞ്ഞു.അതെ സമയം കഴിഞ്ഞ പ്രളയത്തില്‍ കൃഷി പാടെ നശിച്ച് പോയതിനാലാണ് കരഭൂമിയില്‍ കൃഷി ആവശ്യത്തിനായി മണ്ണ് നിക്ഷേപിച്ചിട്ടുള്ളതെന്നും റവന്യൂ അധികൃതര്‍ സ്ഥലം സന്ദര്‍ശിച്ച് പരിശോധന നടത്തി അനുകൂലമായ നിലപാടാണ് സ്വീകരിച്ചതെന്നും സ്ഥലമുടമ പറയുന്നു.ഇതിനിടെ റോഡ് വീതികൂട്ടലിന്റെ ഭാഗമായി നീക്കം ചെയ്ത മണ്ണ് പ്രദേശത്തെ നിരവധി സ്ഥലങ്ങളില്‍ അനധികൃതമായി നിക്ഷേപിച്ചതായും പരാതികള്‍ ഉയരുന്നുണ്ട്.
