തിങ്കളാഴ്ച്ച മുതല്‍ കനത്തമഴയും കാറ്റും, വയനാട് അടക്കം 8 ജില്ലകളില്‍ ജാഗ്രതാ നിര്‍ദ്ദേശം. മലയോരങ്ങളില്‍ മണ്ണിടിച്ചിലിന് സാധ്യതയുള്ളതിനാല്‍ രാത്രിയാത്ര ഒഴിവാക്കാന്‍ നിര്‍ദ്ദേശം. കേന്ദ്ര കാലാവസ്ഥ വകുപ്പ് 8 ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. ശ്രീലങ്കന്‍ ടിങ്കോ മാലിക്ക് സമീപം രൂപം കൊണ്ട ന്യൂന മര്‍ദ്ദം ഞായറാഴ്ചയോടെ ചുഴലിക്കൊടുങ്കാറ്റായി മാറി തിങ്കളാഴ്ചയോ ചൊവ്വാഴ്ച്ച പുലര്‍ച്ചയോ തമിഴ്‌നാട് ആന്ധ്ര തീരം തൊടുമെന്നാണ് കേന്ദ്ര കാലാവസ്ഥ വകുപ്പ് കണക്കാക്കുന്നത്. ഈ മേഖലയില്‍ 80 മുതല്‍ 100 കിലോ മീറ്റര്‍ വരെ വേഗതയില്‍ കാറ്റടിക്കാനാണ് സാധ്യത. കേരളത്തെ ഇതു നേരിട്ട് ബാധിക്കില്ലെങ്കിലും തിങ്കളാഴ്ച്ച മുതല്‍ സംസ്ഥാനത്ത് കനത്ത മഴ ലഭിക്കുമെന്നാണ് മുന്നറിയിപ്പ്. വയനാട്, മലപ്പുറം, കോഴിക്കോട്, പാലക്കാട്, തൃശ്ശൂര്‍, ഇടുക്കി, കോട്ടയം, എറണാകുളം ജില്ലകള്‍ക്കാണ് യെല്ലോ അലര്‍ട്ട് നല്‍കിയിരിക്കുന്നത്.
