ഇന്ത്യന്‍ ജനാധിപത്യത്തെ സംരക്ഷിക്കുക എന്ന മുദ്രാവാക്യമുയര്‍ത്തി ജില്ലയിലെ മുഴുവന്‍ കോളേജ് യൂണിറ്റ് കമ്മിറ്റികളുടെയും പ്രാദേശിക ലോക്കല്‍ കമ്മിറ്റികളുടെയും നേതൃത്വത്തില്‍ എസ്.എഫ്.ഐ വോട്ടര്‍ പട്ടികയില്‍ പേര് ചേര്‍ക്കല്‍ ക്യാമ്പയിന്‍ സംഘടിപ്പിച്ചു. എസ്.എഫ്.ഐ കോളേജ് യൂണിറ്റ് കമ്മിറ്റികള്‍ക്ക് പുറമേ ജില്ലയിലെ പ്രാദേശിക എസ്.എഫ്.ഐ കമ്മിറ്റികളുടെയും നേതൃത്വത്തില്‍ നടന്ന ക്യാമ്പയിന്‍ ജില്ലയിലെ 18 വയസ്സ് പൂര്‍ത്തിയായ പുതിയ വോട്ടര്‍മാര്‍ക്കും, ഇതുവരെ പേര് ചേര്‍ത്തിട്ടില്ലാത്തവര്‍ക്കും വോട്ടര്‍ പട്ടികയില്‍ പേര് ചേര്‍ക്കാനുള്ള വേദി ഒരുക്കി. ഏപ്രില്‍ 23ന് നടക്കുന്ന പാര്‍ലമെന്റ് ഇലക്ഷന്‍ പ്രവര്‍ത്തനങ്ങളുടെ തുടക്കം എന്ന രൂപത്തിലാണ് പരിപാടി സംഘടിപ്പിച്ചതെന്നും ഇനിയും വോട്ടര്‍ പട്ടികയില്‍ പേര് ചേര്‍ക്കാത്തവര്‍ക്ക് വരും ദിവസങ്ങളിലും എസ്.എഫ്.ഐയുടെ പ്രാദേശിക, കോളേജ് ഹെല്‍പ്പ് ഡെസ്‌ക്കുകള്‍ മുഖേന വോട്ട് ചേര്‍ക്കാനുള്ള സൗകര്യം ഒരുക്കുമെന്നും എസ്.എഫ്.ഐ ജില്ലാ കമ്മിറ്റി അറിയിച്ചു.
