ബൈക്ക് യാത്രികരില് ഒരാള് ഹെല്മെറ്റ് ധരിക്കാത്തതിനെ തുടര്ന്ന് പോലീസ് പിടികൂടിയ യുവാക്കളെ പരിശോധിച്ചപ്പോള് കഞ്ചാവ് കണ്ടെത്തി. 604 ഗ്രാം കഞ്ചാവുമായി എടവക സ്വദേശികളായ കുന്നുമ്മല് വീട്ടില് ജി. ഗോകുല് (21) തൃപ്പണിക്കര വീട്ടില് ടി.ജെ. അരുണ്(19) എന്നിവരെയാണ് മാനന്തവാടി പോലീസ് അറസ്റ്റ് ചെയ്തത്. മാനന്തവാടി ടൗണിലെ വള്ളിയൂര്ക്കാവ് റോഡ് ജങ്ഷനില് വാഹന പരിശോധനക്കിടെ കഴിഞ്ഞ രാത്രിയോടെയാണ് ഇവര് പിടിയിലാകുന്നത്.
കൊയിലേരി ഭാഗത്തു നിന്നും മാനന്തവാടി ഭാഗത്തേക്ക് കെ.എല് 78 ബി 8608 നമ്പര് ബൈക്കില് പോവുകയായിരുന്ന ഇവരില് പിന്നിലിരുന്നയാള് ഹെല്മെറ്റ് ധരിക്കാത്തതിനാല് പോലീസ് കൈ കാണിച്ച വാഹനം നിര്ത്തിച്ചു. തുടര്ന്ന് നടത്തിയ പരിശോധനയിലാണ് ടാങ്ക് കവറില് സൂക്ഷിച്ച നിലയിലും രണ്ടുപേരുടെയും അരയില് ഒളിപ്പിച്ച നിലയിലും കഞ്ചാവ് അടങ്ങിയ പൊതികള് കണ്ടെടുത്തത്. മാനന്തവാടി പോലീസ് സ്റ്റേഷന് സബ് ഇന്സ്പെക്ടര് കെ. കെ സോബിന്, എ.എസ്.ഐ സുരേഷ്, സീനിയര് സിവില് പോലീസ് ഓഫീസര്മാരായ കെ സുഷാന്ത്, മനു അഗസ്റ്റ്യന്, സിവില് പോലീസ് ഓഫീസറായ ഇ. സി ഗോപി, പ്രജീഷ്, ശ്രീജിത്ത് എന്നിവരാണ് പോലീസ് സംഘത്തിലുണ്ടായിരുന്നത്.
