അനധികൃതമായി മാലിന്യം നിക്ഷേപിച്ചവരെ പിടികൂടി പിഴയടപ്പിച്ച് അമ്പലവയല്‍ ഗ്രാമപഞ്ചായത്ത്. അമ്പലവയല്‍ സുല്‍ത്താന്‍ ബത്തേരി റോഡില്‍ ആയിരംകൊല്ലി ചീങ്ങേരി ഭഗങ്ങളിലാണ് ചാക്കില്‍ കെട്ടിയ ഹോട്ടല്‍ മാലിന്യങ്ങള്‍ ഉപേക്ഷിച്ചത്. ആരോഗ്യവകുപ്പും പഞ്ചായത്തും സിസിടിവി ക്യാമറയുടെയും, മറ്റ് തെളിവുകളുടേയും അടിസ്ഥാനത്തിലാണ് മാലിന്യം നിക്ഷേപിച്ച അമ്പലവയലിലെ ഹോട്ടല്‍ ഉടമയെ പിടികൂടി പതിനായിരം രൂപ പിഴയടപ്പിച്ചത്.
അമ്പലവയല്‍ സുല്‍ത്താന്‍ ബത്തേരി റോഡിലെ ജനവാസം കുറവുള്ള ചീങ്ങേരി താഴെ ആയിരം കൊല്ലി ഭാഗങ്ങളില്‍ മാലിന്യം തള്ളുന്നത് പതിവായിരുന്നു. ചാക്കിലും മറ്റും നിറച്ച മാലിന്യം സാമൂഹ്യവിരുദ്ധര്‍ വാഹനങ്ങളിലെത്തി പാതയോരത്ത് വ്യാപകമായി തള്ളുകയാണ്. ഇതോടെ പഞ്ചായത്തിന്റെ നേതൃത്വത്തില്‍ മുഴുവന്‍ മല്യനങ്ങളും നീക്കം ചെയ്ത് പഞ്ചായത്തും ആരോഗ്യവകുപ്പും പരിശോധന കര്‍ശനമാക്കി. ഇതിനിടയിലാണ് കഴിഞ്ഞ ദിവസങ്ങളില്‍ ഈ പ്രദേശത്ത് വീണ്ടും മാലിന്യം തള്ളിയത്. അനധികൃതമായി മാലിന്യങ്ങള്‍ തള്ളുന്ന സാമൂഹ്യ വിരുദ്ധര്‍ക്കെതിര വരും ദിവസങ്ങളിലും കര്‍ശന പരിശോധനകള്‍ നടത്തുമെന്ന് ഗ്രാമപഞ്ചായത്ത്, ആരോഗ്യ വിഭാഗം അധികൃതര്‍ പറഞ്ഞു.
