പുല്‍പള്ളി: ഇക്കൊല്ലത്തെ കുപ്പത്തോട് മാധവന്‍ നായര്‍ പുരസ്‌കാരം പ്രൊഫ. ടി. മോഹന്‍ ബാബുവിന് നല്‍കാന്‍ തീരുമാനിച്ചതായി പുരസ്‌കാര കമ്മിറ്റി ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. പഴശ്ശിരാജാ കോളേജിന്റെ പ്രിന്‍സിപ്പാളായി ദീര്‍ഘകാലം സേവനമനുഷ്ഠിച്ച പ്രൊഫ. ടി. മോഹന്‍ബാബുവിനെ പുല്‍പള്ളി മേഖലയെ ഉന്നത വിദ്യാഭ്യാസ രംഗത്തേക്ക് കൈ പിടിച്ചുയര്‍ത്തുന്നതില്‍ വഹിച്ച പങ്ക് പരിഗണിച്ചാണ് പുരസ്‌കാരത്തിനായി തിരഞ്ഞെടുത്തത്. ഡിസംബര്‍ ആറിന് കുപ്പത്തോട് മാധവന്‍ നായര്‍ അനുസ്മരണ ഉദ്ഘാടനവും പുരസ്‌കാര സമര്‍പ്പണവും ബ്ലോക്ക് പഞ്ചായത്ത് പ്രസിഡണ്ട് ടി.എസ്. ദിലീപ് കുമാര്‍ നിര്‍വ്വഹിക്കും. കെ.എല്‍. പൗലോസ് മുഖ്യ പ്രഭാഷണം നടത്തും. എം. ഗംഗാധരന്‍ മാസ്റ്റര്‍, എം.ബി. സുധീന്ദ്രകുമാര്‍, ടി.വി. സന്തോഷ്‌കുമാര്‍, മത്തായി ആതിര എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.
