പുല്‍പ്പള്ളി കാപ്പിസെറ്റില്‍ പത്താം ക്ലാസ് വിദ്യാര്‍ത്ഥിനിയെ വീടിന് സമീപത്തെ കുളിമുറിയില്‍ മരിച്ച നിലയില്‍ കണ്ടെത്തിയ കേസില്‍ ക്രൈംബ്രാഞ്ച് അന്വേഷണം തുടങ്ങി. അന്വേഷണത്തിന്റെ ഭാഗമായി ക്രൈംബ്രാഞ്ച് ഡി.വൈ.എസ്.പി. കെ.കെ രാധാകൃഷ്ണന്റെ നേതൃത്വത്തിലുള്ള സംഘം കാപ്പി സെറ്റിലുള്ള വീട്ടിലെത്തി പെണ്‍കുട്ടിയുടെ ബന്ധുക്കളോടും ആക്ഷന്‍ കമ്മിറ്റി അംഗങ്ങളോടും വിവരങ്ങള്‍ ചോദിച്ചറിഞ്ഞു. പെണ്‍കുട്ടിയെ മരിച്ച നിലയില്‍ കണ്ടെത്തിയ സ്ഥലവും സംഘം പരിശോധിച്ചു. കഴിഞ്ഞ ജൂലൈയിലാണ് കേസ് ക്രൈംബ്രാഞ്ചിന് കൈമാറികൊണ്ട് ഹൈക്കോടതി ഉത്തരവിട്ടത്. നാട്ടുകാരും ബന്ധുക്കളും ചേര്‍ന്ന് രൂപീകരിച്ച ആക്ഷന്‍ കമ്മിറ്റിയാണ് പെണ്‍കുട്ടിയുടെ മരണത്തില്‍ ദുരൂഹത ആരോപിച്ച് ഹൈക്കോടതിയെ സമീപിച്ചത്. അതേ സമയം ഉത്തരവ് കഴിഞ്ഞ ദിവസമാണ് ക്രൈംബ്രാഞ്ചിന് ലഭിച്ചത്. 2017 ഡിസംബര്‍ 14 നാണ് മറ്റേക്കാട്ട് പുത്തന്‍പുരയില്‍ ഷാജി-ദീപ ദമ്പതികളുടെ മകള്‍ ആദിത്യയെ വീടിന് സമീപത്തെ കുളിമുറിയില്‍ മരിച്ച നിലയില്‍ കണ്ടെത്തിയത്.
