പ്രളയക്കെടുതിയില്‍ ദുരിതം അനുഭവിക്കുന്ന കര്‍ഷകരെ സഹായിക്കാന്‍ കേന്ദ്ര സംസ്ഥാന സര്‍ക്കാരുകള്‍ തയ്യാറാകണമെന്നും കര്‍ഷകരോടുള്ള അവഗണന അവസാനിപ്പിക്കണമെന്നും കെപിസിസി എക്‌സിക്യൂട്ടീവ് അംഗം എന്‍ ഡി അപ്പച്ചന്‍. മുള്ളന്‍കൊല്ലി കൃഷിഭവന് മുന്‍പില്‍ കര്‍ഷക കോണ്‍ഗ്രസ് മണ്ഡലം കമ്മിറ്റിയുടെ നേതൃത്വത്തില്‍ നടത്തിയ ധര്‍ണ്ണ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. വരള്‍ച്ച മൂലം കോടിക്കണക്കിന് കൃഷിനാശമാണ് മേഖലയിലുണ്ടായത്. മേഖല സന്ദര്‍ശിക്കാന്‍ കൃഷിവകുപ്പ് മന്ത്രിയും ഉന്നത ഉദ്യോഗസ്ഥരും തയ്യാറാകാത്തത് പ്രതിഷേധാര്‍ഹമാണ്. കെ ടി തോമസ് അധ്യക്ഷത വഹിച്ചു. ജില്ലാ പ്രസിഡന്റ് ജോഷി സിറിയക്, ഡിസിസി സെക്രട്ടറി പി ഡി സജി, സാബു എബ്രാഹം, മനോജ് കടുപ്പില്‍, സുനില്‍ പാലയ്ക്കല്‍, വര്‍ഗീസ് മുരിയന്‍കാവില്‍ എന്നിവര്‍ പ്രസംഗിച്ചു.
