വയനാട്ടില്‍ കേരള ഭൂപരിഷ്‌കരണ നിയമപ്രകാരം ഇളവുലഭിച്ച തോട്ടം ഭൂമിയുടെ ഭാഗം കൈവശംവയ്ക്കുന്ന അയ്യായിരത്തോളം കുടുംബങ്ങള്‍ ആശങ്കയില്‍.കൈവശഭൂമി മിച്ചഭൂമിയായി പിടിച്ചെടുക്കാതിരിക്കുന്നതിനു കാരണമുണ്ടെങ്കില്‍ ബോധിപ്പിക്കുന്നതിനു ലാന്‍ഡ് ബോര്‍ഡില്‍നിന്നു നോട്ടീസ് ലഭിച്ചതാണ് കുടുംബങ്ങളെ ആശങ്കയിലാക്കിയതെന്ന് വയനാട് ഭൂ ഉടസ്ഥാവകാശ സംരക്ഷണ സമിതി ഭാരവാഹികള്‍ കല്‍പ്പറ്റയില്‍ വാര്‍ത്താസമ്മേളനത്തില്‍ പറഞ്ഞു.
അഞ്ചു സെന്റ് മുതല്‍ അഞ്ച് ഏക്കര്‍ വരെ ഭൂമി കൈവശമുള്ളവര്‍ നോട്ടീസ് ലഭിച്ചതില്‍ ഉള്‍പ്പെടും.ഇതില്‍പ്പെട്ടവര്‍ വയനാട് ഭൂ ഉടസ്ഥാവകാശ സംരക്ഷണ സമിതി രൂപീകരിച്ച് കല്‍പറ്റ എം.എല്‍.എ സി.കെ.ശശീന്ദ്രന്‍ മുഖേന മുഖ്യമന്ത്രിക്കു നിവേദനം നല്‍കിയിട്ടുണ്ടെന്നും,ലാന്‍ഡ് ബോര്‍ഡ് നോട്ടീസ് പിന്‍ലിക്കുന്നതിനും കൈവശഭൂമിയിലുള്ള അവകാശം ക്രമപ്പെടുത്തുന്നതിനും ഇടപെടണമെന്നാണ് നിവേദനത്തില്‍ ആവശ്യപ്പെട്ടതെന്നും ഭാരവാഹികള്‍ പറഞ്ഞു.ഇടത്തരം തോട്ടങ്ങളുടെ ഭാഗമായിരുന്നതും ഉടമകളുടെ മരണത്തെത്തുടര്‍ന്നു അവകാശികള്‍ക്കു ലഭിച്ചതുമായ ഭൂമി കൈവശം വയ്ക്കുന്നവര്‍ക്കും അവകാശികളില്‍നിന്നു സ്ഥലം വിലയ്ക്കുവാങ്ങിയവര്‍ക്കുമാണ് താലൂക്ക് ലാന്‍ഡ് ബോര്‍ഡ് നോട്ടീസ് ലഭിച്ചതെന്നും, രണ്ടു പതിറ്റാണ്ടിലധികമായി ഭൂമി കൈവശം വയ്ക്കുന്ന ഭൂമി പണയപ്പെടുത്തി ബാങ്കില്‍നിന്നു ഭവനവായ്പയെടുത്തവരും നോട്ടീസ് ലഭിച്ചതില്‍ ഉള്‍പ്പെടുമെന്ന് ഭാരവാഹികള്‍ കൂട്ടിച്ചേര്‍ത്തു.സമിതി ചെയര്‍മാന്‍ അഡ്വ.എന്‍.സാദിഖ്, ജനറല്‍ കണ്‍വീനര്‍ ബേബി മാത്യു, വൈസ് ചെയര്‍മാന്‍ പ്രൊ.പി.സി.രാമന്‍കുട്ടി, ട്രഷറര്‍ പി.ആര്‍.ബാലകൃഷ്ണന്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
