മുത്തങ്ങയില്‍ 51 ലക്ഷംരൂപയുടെ കുഴല്‍പ്പണം പിടികൂടിയ സംഭവത്തില്‍ പൊലിസ് അന്വേഷണം ആരംഭിച്ചു. പണത്തിന്റെ ഉറവിടവും പിടിയിലായ ഐഎന്‍ടിയുസി നേതാവായിരുന്ന ആളിന്റെയടക്കം ഫോണ്‍ രേഖകളുമാണ് പരിശോധിക്കുന്നത്. പ്രതികളെ കോടതിയില്‍ ഹാജരാക്കി.മതിയായ രേഖകളില്ലാതെ കര്‍ണാടകത്തില്‍ നിന്നും പച്ചക്കറി വണ്ടിയില്‍ സംസ്ഥാനത്തേക്ക് കടത്തുകയായിരുന്ന പണം പിടികൂടിയ സംഭവത്തിലാണ് പൊലീസ് പ്രാഥമിക അന്വേഷണം ആരംഭിച്ചിരിക്കുന്നത്. പിടികൂടിയ പണം കള്ളനോട്ടാണോ എന്നറിയാന്‍ പരിശോധന നടത്തും.
കൂടാതെ പിടിയിലായവരുടെ ഫോണ്‍ ഡീറ്റെയില്‍സും പൊലീസ് പരിശോധിച്ചു വരുകയാണ്. സംഭവത്തില്‍ പിടിയിലായവരെ കോടതിയില്‍ ഹാജരാക്കി. പൊലീസിന്റെ പ്രാഥമിക അന്വേഷണത്തിനു ശേഷം കേസ് എന്‍ഫോഴ്‌സ്‌മെന്റിന് കൈമാറും എന്നാണ് അറിയുന്നത്. കഴിഞ്ഞ രാത്രിയിലാണ് മുത്തങ്ങ തകരപ്പാടിയില്‍ വച്ച് രേഖകളില്ലാതെ കടത്തുകയായിരുന്ന അമ്പത്തിയൊന്ന് ലക്ഷത്തി 39450 രൂപ പിടികൂടിയത്. സംഭവത്തില്‍ ഐ എന്‍ ടി യു സി നേതാവായിരുന്ന കമ്പളക്കാട് സ്വദേശി പഞ്ചാര അഷറഫ് (43), കൊടുവള്ളി സ്വദേശി മുജീബ് റഹമാന്‍ (44) എന്നിവരെ അറസ്റ്റ് ചെയ്യുകയും വാഹനം കസ്റ്റഡിയിലെടുക്കുകയും ചെയ്തിരുന്നു. ജില്ലാ പൊലിസ് മേധാവിക്ക് ലഭിച്ച രഹസ്യവിവരത്തിന്റെ അടിസ്ഥാനത്തില്‍ ജില്ലാ പൊലിസ് സ്‌ക്വാഡും സുല്‍ത്താന്‍ ബത്തേരി പൊലിസ് സര്‍ക്കിള്‍ ഇന്‍പെക്ടര്‍ പുഷ്പ്പകുമാറിന്റെയും എസ് ഐ മണിയുടെയും നേതൃത്വത്തിലുള്ള സംഘമാണ് പണം പിടികൂടിയത്
