കല്‍പ്പറ്റ: ഇന്ത്യയുടെ പ്രഥമ പ്രധാനമന്ത്രി പണ്ഡിറ്റ് ജവഹര്‍ലാല്‍ നെഹ്റുവിന്‍റെ 56-ാം ചരമ വാര്‍ഷികം ജില്ലാ കോണ്‍ഗ്രസ്സ് കമ്മിറ്റിയുടെ ആഭിമുഖ്യത്തില്‍ സമുചിതമായി ആചരിച്ചു. സ്വതന്ത്ര ഭാരതത്തിന്‍റെ സമൂലമായ വികസനത്തിന് അടിത്തറ പാകിയ നവഭാരത ശില്‍പിയാണ് പണ്ഡിറ്റ് ജവഹര്‍ലാല്‍ നെഹ്റുവെന്ന് ജില്ലാ കോണ്‍ഗ്രസ്സ് കമ്മിറ്റി അഭിപ്രായപ്പെട്ടു. രാജ്യത്തിന്‍റെ വിവിധ മേഖലകളില്‍ ഇന്ന് കാണുന്ന വളര്‍ച്ചയ്ക്ക് തുടക്കം കുറിച്ചത് അദ്ദേഹത്തിന്‍റെ കാലഘട്ടത്തിലായിരുന്നു. രാജ്യത്ത് പട്ടിണിയും, പരിവട്ടവുമായി കഴിഞ്ഞിരുന്ന ജനങ്ങളെ പുരോഗതിയുടെ പാതയിലേക്ക് നയിക്കുന്നതില്‍ പണ്ഡിറ്റ് ജവഹര്‍ലാല്‍ നെഹ്റു കാണിച്ച് തന്ന വെട്ടിത്തുറന്ന പാതകള്‍ വളരെ സജീവമായിരുന്നു. അതിലൂടെയാണ് തികഞ്ഞ ജനാധിപത്യ-മതേതര വാതിയും ഭാരതത്തിന്‍റെ മണ്ണില്‍ ജനാധിപത്യ-മതേതര സങ്കല്‍പ്പങ്ങള്‍ രൂഢമൂലമാക്കിയതും പണ്ഡിറ്റ് ജവഹര്‍ലാല്‍ നെഹ്റുവിന്‍റെ പ്രവര്‍ത്തനഫലമാണെന്നും ഡി.സി.സി വിലയിരുത്തി. ഡി.സി.സി പ്രസിഡന്‍റ് ഐ.സി ബാലകൃഷ്ണന്‍ എം.എല്‍.എ ജവഹര്‍ലാല്‍ നെഹ്റുവിന്‍റെ ഛായചിത്രത്തിന് മുമ്പില്‍ നിലവിളക്ക് കൊളുത്തി ഉദ്ഘാടനം ചെയ്തു. പി.പി ആലി, സി. ജയപ്രസാദ്, ജി. വിജയമ്മ, ടി.ജെ ഐസക്ക്, വി.നൗഷാദ് തുടങ്ങിയവര്‍ സംബന്ധിച്ചു.
