വന്യമൃഗശല്യത്തിന് പരിഹാരം കാണണമെന്നാവശ്യപ്പെട്ട് ജനാധിപത്യ കേരളാ കോണ്‍ഗ്രസ് ജില്ലാ കമ്മിറ്റി നേതൃത്വത്തില്‍ ബഹുജന പ്രക്ഷോഭം ആരംഭിക്കാന്‍ പുല്‍പള്ളിയില്‍ ചേര്‍ന്ന സമര പ്രഖ്യാപന കണ്‍വെന്‍ഷന്‍ തീരുമാനിച്ചു. ജില്ലയില്‍ മാസങ്ങളായി രൂക്ഷമായിക്കൊണ്ടിരിക്കുന്ന വന്യമൃഗശല്യം മൂലം ലക്ഷങ്ങളുടെ കൃഷിനാശമാണ് കര്‍ഷകര്‍ക്കുണ്ടായത്. വായ്പയെടുത്തും മറ്റും വര്‍ഷങ്ങളായി നട്ടുപരിപാലിച്ചു വന്ന കാര്‍ഷിക വിളകള്‍ വന്യമൃഗങ്ങള്‍ നശിപ്പിച്ചതോടെ കര്‍ഷകര്‍ കടുത്ത പ്രതിസന്ധിയിലായിരിക്കുകയാണെന്ന് ജില്ലാ പ്രസിഡന്റ് കെ.എ. ആന്റണി പറഞ്ഞു. പ്രക്ഷോഭത്തിന്റെ ഭാഗമായി ജില്ലയിലെ മൂന്ന് താലൂക്കുകളിലും റേഞ്ച് ഓഫീസുകള്‍ക്ക് മുമ്പില്‍ സമരത്തിന് ഈ മാസം 18-ന് തുടക്കം കുറിക്കും. കര്‍ഷക യൂണിയന്‍ സംസ്ഥാന സെക്രട്ടറി വിന്‍സണ്‍ നെടുംകൊമ്പില്‍ അധ്യക്ഷനായിരുന്നു. ജില്ലാ വൈസ് പ്രസിഡന്റ് വി.എസ്. ചാക്കോ, എബി പൂക്കൊമ്പേല്‍, ജോണ്‍സണ്, ക്ലീറ്റസ് മുതിരക്കാലയില്‍, എന്നിവര്‍ സംസാരിച്ചു.
