പുല്‍പ്പള്ളി: മരക്കടവില്‍ പച്ചിക്കല്‍ പാപ്പച്ചന്റെ വീടിനോട് ചേര്‍ന്ന തൊഴുത്തില്‍ കെട്ടിയിട്ടിരുന്ന ഒന്നര വയസുള്ള പശുക്കിടാവിനെയാണ് കടുവ ആക്രമിച്ച് കൊന്നത്. ഞായറാഴ്ച്ച പുലര്‍ച്ചെ പശുക്കിടാവിന്റെ അലര്‍ച്ചകേട്ട് വീട്ടുകാര്‍ തൊഴുത്തിലെ ലൈറ്റിട്ടതിനെ തുടര്‍ന്ന് കടുവ ഓടി മറയുകയായിരുന്നു. കടുവയുടെ ആക്രമണത്തില്‍ പശുവിന്റെ കഴുത്തിന് ഗുരുതരമായി മുറിവേറ്റതിനെ തുടര്‍ന്നാണ് പശുക്കിടാവ് ചത്തത്. പാടിച്ചിറ വെറ്ററിനറി സര്‍ജന്റെ നേതൃത്വത്തില്‍ പരിശോധിച്ചതിനെ തുടര്‍ന്ന് കടുവ തന്നെയാണ് ആക്രമിച്ചതെന്ന് കണ്ടെത്തി. തുടര്‍ന്ന് വനം വകുപ്പ് ഉദ്യോഗസ്ഥര്‍ സ്ഥലത്തെത്തി മേല്‍നടപടി സ്വീകരിച്ചു. ശല്യക്കാരനായ കടുവയെ കൂട് വെച്ച് പിടികൂടാന്‍ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
