കര്‍ണാടകയില്‍ നിന്നും കഞ്ചാവ് വാങ്ങി വില്‍പനയ്ക്കായി മലപ്പുറത്തേക്ക് കടത്തിക്കൊണ്ടുപോകുന്നതിനിടെ രണ്ട് യുവാക്കള്‍ പോലീസ് പിടിയിലായി. മലപ്പുറം സ്വദേശികളായ എം.കെ. ലത്തീഫ്,ഇ. ഷംനാദ് എന്നിവരാണ് പിടിയിലായത്. പുല്‍പ്പള്ളി പോലീസ് രാവിലെ ഒമ്പത് മണിയോടെ പെരിക്കല്ലൂരില്‍ നടത്തിയ പരിശോധനയിലാണ് യുവാക്കള്‍ പിടിയിലായത്. ഇവരുടെ പക്കല്‍ നിന്നും 830 ഗ്രാം കഞ്ചാവ് കണ്ടെടുത്തു. ബൈരക്കുപ്പയില്‍ നിന്നും കഞ്ചാവ് വാങ്ങിയ ശേഷം തോണി കടന്ന് പെരിക്കല്ലൂരിലെത്തിയപ്പോഴായിരുന്നു പ്രതികളെ പോലീസ് പിടികൂടിയത്. ഇവര്‍ കഞ്ചാവ് കടത്തിക്കൊണ്ടുപോകാനുപയോഗിച്ച സ്‌കൂട്ടറും പോലീസ് കസ്റ്റഡിയിലെടുത്തിട്ടുണ്ട്. എസ്.ഐ. എച്ച്. ഷാജഹാന്റെ നേതൃത്വത്തില്‍ എ.എസ്.ഐ. ഫിലിപ്പ്, സീനിയര്‍ സിവില്‍ പോലീസ് ഓഫീസര്‍ അജീഷ് എന്നിവരടങ്ങിയ സംഘമാണ് പ്രതികളെ പിടികൂടിയത്.
