സീതാമൗണ്ടില്‍ ഉദ്ഘാടനം ചെയ്ത പച്ചത്തേങ്ങാ സംഭരണ കേന്ദ്രം തുറന്ന് പ്രവര്‍ത്തിക്കാന്‍ നടപടികളില്ല.6 മാസം മുമ്പ് പാടിച്ചിറയിലെത്തിയപ്പോഴാണ് കര്‍ഷകരുടെ ആവശ്യം പരിഗണിച്ച് മന്ത്രി പി. പ്രസാദ് ജില്ലയ്ക്കായി മുള്ളന്‍കൊല്ലിയില്‍ പച്ചത്തേങ്ങാ സംഭരണ കേന്ദ്രം പ്രഖ്യാപിച്ചത്. എന്നാല്‍ നാളിതുവരെയായിട്ടും തേങ്ങാ സംഭരണം ആരംഭിക്കാന്‍ കൃഷി വകുപ്പിന്റെ ഭാഗത്തുനിന്ന് നടപടിയില്ലെന്നാണ് കര്‍ഷകരുടെ പരാതി.മുള്ളന്‍കൊല്ലി പഞ്ചായത്തിലെ സീതാമൗണ്ട് ക്ഷീരസംഘം ഹാളില്‍ പച്ചത്തേങ്ങ സംഭരണ കേന്ദ്രത്തിന്റെ ഉദ്ഘാടനം ഐ.സി. ബാലകൃഷ്ണന്‍ എം.എല്‍.എയാണ് നിര്‍വഹിച്ചത്.വേനലാരംഭിച്ചതോടെ ഭൂരിഭാഗം കര്‍ഷകരും തേങ്ങയുടെ വിളവെടുപ്പ് ആരംഭിച്ചു. എന്നാല്‍ വില്‍ക്കാന്‍ കഴിയാതെ വീടിന്റെ മുറ്റങ്ങളില്‍ കൂട്ടിയിടേണ്ട ആവസ്ഥയിലാണ്. സംഭരണ കേന്ദ്രം ആരംഭിച്ചപ്പോള്‍ കൂടുതല്‍ വില ലഭിക്കുമെന്ന പ്രതീക്ഷയിലായിരുന്നു കര്‍ഷകര്‍. എന്നാല്‍ സംഭരണ കേന്ദ്രം ആരംഭിക്കാത്തത് കര്‍ഷകരെ പ്രതിസന്ധിയിലാക്കിയിരിക്കുകയാണ്. സംഭരണ കേന്ദ്രം ആരംഭിക്കാന്‍ ഉത്തരവാദിത്വപ്പെട്ടവരുടെ ഭാഗത്തുനിന്നും നടപടിയുണ്ടാകണമെന്നാണ് കര്‍ഷകരുടെ ആവശ്യം.
