അധികാര ദുര്‍വിനിയോഗം നടത്തിയ മാനന്തവാടി നഗരസഭ കുടുംബശ്രീ സിഡിഎസ് വൈസ് ചെയര്പേഴ്സണെ
പുറത്താക്കണമെന്ന് നഗരസഭ ഭരണ സമിതി.നഗരസഭ ചെയര്പേഴ്സണെ പോലും അറിയിക്കാതെ നിയമനങ്ങള്‍ നടത്താന്‍ തീരുമാനിച്ച സിഡിഎസ് വൈസ് ചെയര്‍പേഴ്‌സണെതിരെ നിയമ നടപടി സ്വീകരിക്കുമെന്നും ഭരണ സമിതി വാര്‍ത്താ സമ്മേളനത്തില്‍ അറിയിച്ചു.
നഗരസഭ ചെയര്‍പേഴ്‌സണ്‍ ഒപ്പിടേണ്ട മിനുട്‌സ് തീരുമാനം സ്വയം എഴുതി ഒപ്പിടുകയും അഞ്ച് പേരെ കുറുവ ദ്വീപില്‍ നിയമിക്കാന്‍ ശുപാര്‍ശ ചെയ്യുകയുമാണ് സിഡിഎസ് വൈസ് ചെയര്‍ പേഴ്‌സണ്‍ ചെയ്തത്.സി ഡി എസ് വിലയിരുത്തല്‍ സമിതിയില്‍ 21 ഓളം അംഗങ്ങളാണ് ഉള്ളത്. എന്നാല്‍ നാലു പേരെ
മാത്രം പങ്കെടുപ്പിച്ച് കുടുംബശ്രീയിലെ കൗണ്‍സിലര്‍മാരെ ഒഴിവാക്കിയാണ് യോഗം നടത്തിയത്.അദ്ധ്യക്ഷത വഹിച്ച ചെയര്‍പേഴ്‌സണ്‍ തീരുമാനം രേഖപ്പെടുത്തി തന്നെ കാണിക്കാന്‍ നിര്‍ദ്ദേശിച്ചെങ്കിലും അത് ലംഘിച്ച്
നഗരസഭ ചെയര്‍പേഴ്‌സണ്‍ ഒപ്പിടേണ്ട സ്ഥലത്ത് സി ഡി എസ് വൈസ് ചെയര്‍ പേഴ്‌സണ്‍ ഒപ്പിടുകയാണ് ചെയ്തത്.കഴിഞ്ഞ ഒരു വര്‍ഷമായി സി ഡി എസ് ചെയര്‍മാന്‍ ലീവിലാണ്.പട്ടിക വര്‍ഗ്ഗ റിസര്‍വ്വേഷന്‍ നിലവിലുള്ള സി ഡി എസ് ചെയര്‍മാനെ മാറ്റി നിര്‍ത്തി വൈസ് ചെയര്‍പേഴ്‌സണ്‍ ചുമതല നിര്‍വ്വഹിക്കുകയാണ് .കുടുംബശ്രീ സംവിധാനത്തിന്റെ എല്ലാ മൂല്യങ്ങളും ഒഴിവാക്കി നിരന്തരം സാമ്പത്തിക അഴിമതി ഉള്‍പ്പെടെ നടത്തി വരികയും അധികാരമില്ലാതെ സ്വയം നിയമനം നടത്തുന്ന നടപടി പ്രതിക്ഷേധാര്‍ഹമാണ് .സി.ഡി.എസ്.വൈസ് ചെയര്‍പേഴ്‌സനെതിരെ നടപടി സ്വീകരിക്കണമെന്നാവശ്യപ്പെട്ട് സംസ്ഥാന കുടുംബശ്രീ ഡയറക്ടര്‍ , ജില്ലാ കലക്ടര്‍ , കുടുംബശ്രീ ജില്ല കോഡിനേറ്റര്‍ എന്നിവര്‍ക്ക് പരാതി നല്‍കിയിട്ടുണ്ട്.മുനിസിപ്പല്‍ചെയര്‍ പേഴ്‌സണ്‍ ഒപ്പിടേണ്ട
സ്ഥാനത്ത് ഒപ്പിടുകയും വ്യാജനിയമന രേഖ നല്‍കുകയും ചെയ്ത സി.ഡി.എസ്.വൈസ് ചെയര്‍പേഴ്‌സനെതിരെ നിയമനടപടി സ്വീകരിക്കണമെന്നാവശ്യപ്പെട്ട് കൊണ്ട് മാനന്തവാടി പോലീസ് സ്റ്റേഷനിലും
പരാതി നല്‍കിയതായി നഗരസഭാസ്റ്റിയറിംങ്ങ്കമ്മറ്റി അംഗങ്ങള്‍ വാര്‍ത്താ സമ്മേളനത്തില്‍ പറഞ്ഞു. വാര്‍ത്താ സമ്മേളനത്തില്‍ ചെയര്‍പേഴ്‌സണ്‍ സി.കെ.രത്‌നനവല്ലി ,വൈസ് ചെയര്‍മാന്‍.പി .വി എസ് ,
മൂസ്സ,വികസന കാര്യ സ്റ്റാന്റിംങ്ങ് കമ്മറ്റി ചെയര്‍പേഴ്‌സണ്‍ മാര്‍ഗ്ഗരറ്റ് തോമസ്,പൊതുമരാമത്ത് സ്റ്റാന്റിംങ്ങ് കമ്മറ്റി ചെയര്‍മാന്‍ പി.വി.ജോര്‍ജ്, വിദ്യാഭ്യാസ സ്റ്റാന്റിംങ്ങ് കമ്മറ്റി ചെയര്‍പേഴ്‌സണ്‍ അഡ്വ.സിന്ധു സെബാസ്റ്റ്യന്‍ തുടങ്ങിയവര്‍ പങ്കെടുത്തു.
